قازاقستان مەن قىتاي تۋرالى ەسسە بايقاۋىنىڭ جەڭىمپازدارى انىقتالدى

استانا. قازاقپارات - استانادا «ءبىر بەلدەۋ، ءبىر جول» باستاماسى جانە «نۇرلى جول» باعدارلاماسى تۋرالى «ءوزارا ءتيىمدى ءوسىم مەن وركەندەۋ تراەكتورياسى» ەسسە بايقاۋىنىڭ جەڭىمپازدارى ماراپاتتالدى، دەپ حابارلايدى قازاقپارات ءتىلشىسى.

بايقاۋدى «قازاقپارات» حالىقارالىق اقپارات اگەنتتىگى مەن قىتاي حالىق رەسپۋبليكاسىنىڭ ەلشىلىگى بىرلەسىپ ۇيىمداستىرعان بولاتىن.

«ءبىر بەلدەۋ، ءبىر جول» باستاماسىنىڭ بەس جىلدىق مەرەيتويىنا ارنالعان بۇل بايقاۋعا ەكى ايدا قازاقستاننىڭ تۇپكىر- تۇپكىرىنەن 60-تان استام ماتەريال كەلىپ ءتۇستى. ءبىز ولاردىڭ اراسىنان قازاقستان- قىتاي ىنتىماقتاستىعى مەن حالىقتار اراسىنداعى دوستىقتىڭ بارلىق اسپەكتىلەرى كورىنىس تاپقان ەڭ ۇزدىك ماتەريالداردى تاڭداپ الدىق»، - دەدى قازاقستان رەسپۋبليكاسىنداعى ق ح ر توتەنشە جانە وكىلەتتى ەلشىسىنىڭ مىندەتىن اتقارۋشى ليۋ جيان پي جەڭىمپازداردى ماراپاتتاۋ سالتاناتىندا.

ءوز كەزەگىندە «قازاقپارات» حالىقارالىق اقپارات اگەنتتىگى باس ديرەكتورىنىڭ ءبىرىنشى ورىنباسارى دانيار وتەشيەۆ قازاقستانداعى قىتاي ەلشىلىگىنە ەكىجاقتى قارىم- قاتىناستى نىعايتا تۇسەتىن بايقاۋدى بىرلەسە ۇيىمداستىرعانى ءۇشىن العىس ءبىلدىردى.

«جوبا «قازاقپارات» سايتىندا ۇيىمداستىرىلدى جانە ءدال وسى جوباعا 15 مىڭ قارالىم تىركەلدى. بۇل تاقىرىپ قازىر وتە وزەكتى، سوندىقتان الداعى ۋاقىتتا دا ەكى ەل اراسىنداعى ىنتىماقتاستىقتى دامىتىپ، وسىنداي بايقاۋلاردى ۇيىمداستىرۋ كەرەك. بايقاۋعا قاتىسىپ، بۇگىنگى سالتاناتقا كەلگەن بارشاڭىزعا العىس ايتامىن. بارلىق قاتىسۋشىلارعا ساتتىلىك تىلەيمىن»، - دەپ اتاپ ءوتتى حالىقارالىق اقپارات اگەنتتىگىنىڭ وكىلى.

بايقاۋ ناتيجەسىندە 61 جاستاعى اقتوبەلىك جۋرناليست ميرال جارمۇحامبەتوۆ جۇلدەلى ءبىرىنشى ورىندى جەڭىپ الدى. ودان بولەك، قازاقستاننىڭ تۇپكىر- تۇپكىرىنەن كەلگەن 25 اۆتور ءتۇرلى نوميناتسيالارمەن ماراپاتتالدى.

ەسكە سالا كەتسەك، مامىر ايىندا «قازاقپارات» حالىقارالىق اقپارات اگەنتتىگى مەن قىتاي حالىق رەسپۋبليكاسىنىڭ ەلشىلىگى «ءبىر بەلدەۋ، ءبىر جول» باستاماسى جانە «نۇرلى جول» باعدارلاماسى. ءوزاراتيىمدى ءوسىم مەن وركەندەۋ تراەكتورياسى» تاقىرىبىندا بايقاۋ جاريالاعان بولاتىن.

 كونكۋرسقا بۇرىن جاريالانباعان قازاقستان مەن قىتاي اراسىنداعى ديپلوماتيالىق قارىم- قاتىناستىڭ تاريحى مەن ستراتەگيالىق باسىمدىقتارىنا، XXI عاسىرداعى ۇلى جىبەك جولىنىڭ جاڭعىرۋىنا، قازىرگى الەمدەگى قازاقستان مەن قىتايدىڭ گۋمانيتارلىق ميسسياسىنا ارنالعان ساراپتامالىق ماتەريالدار قابىلداندى.

اۆتور: ايجان سەرىكجان قىزى