ءبىر ەلدىڭ ەكى اتاۋى
باسپاسوزدە دە، تەلەديداردا دا ءجيى بايقايتىنىمىز، اسىرەسە سپورتشىلاردى تانىستىراردا نيدەرلاند مەملەكەتىنەن كەلگەن ادامداردى گوللانديادان كەلگەن سپورتشى دەپ جاتادى. سونىمەن قايسىسى دۇرىس؟ بۇل سۇراقتىڭ جاۋابىن ىزدەۋ ءۇشىن تاريحقا ءۇڭىلىپ كورەيىك. «نيدەرلاند» دەگەن ءسوزدىڭ ءوزى «جەر قويناۋى» دەگەن ماعىنانى بەرەدى. كەيبىر دەرەكتەر مۇنداي اتاۋدى Ⅹ عاسىردا بۇل اۋماق ريم يمپەرياسىنىڭ قول استىندا بولعان كەزدە پايدا بولدى دەيدى. ءبىراق تاريح بەتتەرىندە «نيدەرلاند» ءسوزى ⅩⅣ عاسىردان باستاپ كەزدەسەدى. ۇزاق ۋاقىت بويى بۇل جەردە كوپتەگەن تايپالار ءبىر- بىرىمەن ارالاسقان كۇيى ءومىر سۇرگەن. نەمىس بيلەۋشىلەرى بۇل اۋماقتى ءوز مەنشىگىنە الۋ ءۇشىن ونىڭ تەڭىزگە جاقىن ورنالاسقانىنا قاراپ «جەر قويناۋى» دەپ اتاعان ەكەن. ۋاقىت ءوتتى، بيلەۋشىلەر وزگەردى، پاتشالىقتار قۇلادى. سوڭىندا «جەر قويناۋى» دەپ اتالاتىن ەل ەگەمەندىك الدى. ءبىراق «Nederland» اتى وزگەرمەدى. قازىرگى كۇندە دە الەم ساياساتىندا بۇل مەملەكەت وسى اتاۋمەن تىلگە الىنادى.
ال ەندى گوللانديا اتاۋى قايدان كەلگەن دەگەنگە توقتالاتىن بولساق، بۇل نيدەرلاند مەملەكەتىنىڭ قۇرامىنداعى جەر اتاۋى. گوللانديانىڭ ءوزى وڭتۇستىك جانە سولتۇستىك بولىپ ەكىگە بولىنەدى. تاريحتان ءمالىم سولتۇستىكتىڭ استاناسى امستەردام قالاسى - گوللانديانىڭ دامۋ، ءوسۋ ورتاسى بولعان. ورتا عاسىردا گوللانديانىڭ مادەني جانە ەكونوميكالىق جەتىستىكتەرىنىڭ ءدۇمپۋى بۇكىل ەۋروپاعا تارالعان. 1697 -جىلى رەسەي پاتشاسى پەتر I تۋىستارىمەن گوللاندياعا كەلگەن ەكەن. ول كەمەلەرىن قايتا جوندەۋدەن وتكىزۋ ءۇشىن شەبەرلەردى جالداعان. ۇستالاردان قاي جەردەن كەلدىڭىزدەر دەگەندە ءوز اۋماعىنىڭ دامىعانىنان ماساتتانعان ولار نيدەرلاند ەمەس «گوللانديادان كەلدىك» دەپ جاۋاپ بەرگەن. ۋاقىت وتە كەلە بۇل ەكى اتاۋدى كوپ ادامدار ەكى مەملەكەتتىڭ اتى دەپ ويلاي باستادى. سوندىقتان دا كوبىنە شاتاستىرىپ جاتادى.
نيدەرلاندتىڭ التىن داۋىرىندە مەملەكەتتىڭ ەكونوميكاسى، قۇل ساۋداسى جانە باسقا مەملەكەتتەرمەن ەكونوميكالىق بايلانىستاردى ورناتۋ سياقتى جوعارى لاۋازىمدى ادامدار گوللانديالىقتار بولعان ەكەن. ولار ءوز كەزەگىندە گوللانديا ءسوزىنىڭ ءجيى ايتىلىپ، تارالۋىنا سەپ بولعان.
Massaget.kz
