دەنە شىنىقتىرۋ ساباعىنا قانداي جاڭالىقتار ەنەدى

 الماتى. قازاقپارات - ق ر ءبىلىم جانە عىلىم ءمينيسترىنىڭ كەڭەسشىسى مايراش تايكەنوۆا ەلىمىزدەگى ستۋدەنتتەر سپورتتىنىڭ دامۋى تۋرالى پىكىرىن ءبىلدىردى، دەپ حابارلايدى قازاقپارات ءتىلشىسى.

 19-26 - تامىز كۇندەرى الماتىدا بولاتىن فۋتزالدان ستۋدەنتتەر اراسىنداعى الەم بىرىنشىلىگى الدىندا وتكەن باسپا ءسوز ءماسليحاتىندا ول ءبىلىم بەرۋ مەكەمەلەرىندەگى سپورت سەكسياسىنىڭ جۇمىستارىنا توقتالدى.

 «تيپتىك وقۋ جوسپارىندا دەنە شىنىقتىرۋ ساباعى اپتاسىنا 3 رەت بەلگىلەنگەن. قازىر مينيستر ساباقتىڭ 1/3 بولىگى سايىس تۇرىندە وتكەنىن ءجون كورىپ وتىر. ياعني، وقۋشىلار مەملەكەتتىك ستاندارتقا سايكەس فيزيكالىق دامۋ جاتتىعۋلارىن عانا جاسامايدى، جارىس تۇرىنە وتەدى. مەكتەپ اكىمشىلىگى قانداي سپورت ءتۇرىن دامىتامىن دەسە دە ءوز ەرىكتەرى. ەگەر ول مەكتەپكە فۋتبول قىزىقتى بولسا سونى، حوككەي دەسە حوككەيدى قالدىرسىن» ، - دەدى مايراش تايكەنوۆا.

قازىرگى ءبىلىم بەرۋ جۇيەسىندە ءبىلىم مەكەمەلەرىنە سپورتتىڭ كەز- كەلگەن باعىتىن تاڭداۋىنا جاعداي جاسالعان.

 «بۇدان بولەك كوللەدج ستۋدەنتتەرى دە سپورتقا دەن قويىپ كەلەدى. جارىستار مەن فۋتبول ليگاسى بار. شاحمات ويىنى دامىپ جاتىر. استانادا كەز- كەلگەن مەكتەپتە شاحمات سەكتسياسى بار. فۋتبولدان ۇلتتىق ستۋدەنتتەر ليگاسى سپورتسۇيەر جاستاردىڭ شوعىرىن جيناۋدا» ، - دەدى مايراش تايكەنوۆا.