بايزاق باتىر كەسەنەسى

 استانا. قازاقپارات - جامبىل وبلىسىنىڭ بۇرىنعى ميحايلوۆكا اۋدانى بۇگىندە بايزاق باتىر اتىمەن اتالادى.

بايزاق مامبەت ۇلى -  ەلىمىزدىڭ وڭتۇستىك وڭىرىندە قوقان حاندىعىنا جانە رەسەي يمپەرياسىنا قارسى ۇلت- ازاتتىق كوتەرىلىستى ۇيىمداستىرۋشى باتىر رەتىندە تاريحتان بەلگىلى. اقىرى ول قوقان حانى ءالىمقۇلدىڭ بۇيرىعىمەن زەڭبىرەك اۋزىنا بايلانىپ اتىلادى. ال باتىردىڭ شاشىلىپ كەتكەن دەنەسىنەن قالعان ەكى ساۋساعى تالاس وزەنىنىڭ بويىنداعى سارىكەمەر اۋىلىنىڭ ماڭىنا جەرلەنەدى. بۇل كۇندە باتىر كەسەنەسى اۋليەاتا وڭىرىندەگى تاريحي- مادەني ەسكەرتكىشتەردىڭ بىرىنەن سانالادى. قازاقستان رەسپۋبليكاسى ۇلتتىق مۋزەيىنىڭ جانىنان قۇرىلعان «قاسيەتتى قازاقستان» عىلىمي- زەرتتەۋ ورتالىعىنىڭ «قازاقستاننىڭ جالپىۇلتتىق كيەلى ورىندارى» جوباسى 100 نىسانىنىڭ تىزىمىنە اۋدان ورتالىعى سارىكەمەر اۋىلى ماڭىنداعى «بايزاق بابا» كەسەنەسى ەنگىزىلگەن بولاتىن.

 اتالعان كەسەنە «باتىس ەۋروپا -  باتىس قىتاي» ترانزيتتىك ءدالىزى بويىندا ورنالاسقان. ەندى تاريحي نىسان اينالاسى كورىكتەندىرىلىپ، اباتتاندىرىلاتىن بولسا، بۇل بولاشاقتا تۋريستەردىڭ كەلىپ تاماشالايتىن قاسيەتتى ورنىنا اينالاتىن بولادى. جىل سايىن كەسەنەگە مەكتەپ وقۋشىلارى مەن اۋدان جاستارى كەلەدى. سونىمەن قاتار مۇندا تۋريستەردىڭ ەكسكۋرسيالارىن ۇيىمداستىرۋ، اۋدان كولەمىندەگى تاريحي ورىنداردىڭ ستەندىلەرىن جانە كيەلى جەرلەردىڭ ماكەتتەرىن دايىنداپ، كەسەنە ماڭىنا ورنالاستىرۋ، سونداي- اق ءتۇرلى قولونەر بۇيىمدارىنىڭ كورمەسىن ۇيىمداستىرۋ جوسپارلانۋدا. ال بۇگىنگى تاڭدا كاسىپكەرلەردىڭ دەمەۋشىلىگىمەن «بايزاق بابا» كەسەنەسىنە باراتىن جول سالىنىپ، سۋ تارتىلىپ، كوگالداندىرۋ جۇمىسى قولعا الىنىپ، ماڭىنا كەسپە تاستار توسەلگەن. سونىمەن قاتار كەسەنە ماڭىن جارىقتاندىرۋ جانە اينالاسىن قورشاۋ جۇمىستارى جۇرگىزىلدى. كەلەشەكتە بۇل ورىن اۋليەاتا وڭىرىندەگى قاراحان، ايشا ءبيبى، بابادجا حاتۋن كەسەنەلەرى سەكىلدى تاريحي نىسانعا اينالىپ جاتسا، ءوڭىر تاريحىنا دا تىڭ بەتتەر قوسىلماق.

حاميت ەسامان، «ەگەمەن قازاقستان»