الماتى وبلىسىندا ءۇش اۋىسىمدى مەكتەپ ماسەلەسى وزەكتى بولىپ تۇر
ءۇش اۋىسىمدى مەكتەپتەردىڭ ماسەلەسى تىم باياۋ شەشىلۋدە. قازىر وڭىردە 22 ءبىلىم نىسانىنىڭ قۇرىلىسى ءجۇرىپ جاتىر. سونىڭ تورتەۋى 3 اۋىسىمدى مەكتەپتەردى جويۋ ماقساتىندا سالىنۋدا. ال 30 ءبىلىم نىسانى كۇردەلى جوندەۋدەن ءوتىپ جاتىر.
«سونىڭ ىشىندە ءبىر مەكتەپتە قازىر تولىعىمەن كۇردەلى جوندەۋ جۇمىستارى اياقتالىپ، پايدالانۋعا بەرىلدى. ول - پانفيلوۆ اۋدانىنداعى لەسنوۆكا اۋىلىنداعى راقىشەۆ اتىنداعى مەكتەپ. قالعان نىساندارىمىز 1 قىركۇيەككە دەيىن بەرىلىپ، بالالار 1 -قىركۇيەكتى جاڭا، تازا، كۇردەلى جوندەۋدەن وتكەن عيماراتتا قارسى الادى»، - دەيدى وبلىستىق ءبىلىم باسقارماسىنىڭ باسشىسى گۇلسارا يساعۇلوۆا.
تۇرعىندارى كوبەيىپ، دەموگرافيالىق جاعدايى جىلما-جىل ارتىپ كەلە جاتقان تالدىقورعان قالاسىندا مەكتەپتەردىڭ ازدىعى بايقالادى. سوندىقتان بيىل ءارقايسىسى 1200 ورىندىق 2 مەكتەپتىڭ قۇرىلىسى قاتار اياقتالعالى وتىر. ءبىرى جاڭا ىقشام اۋداننان بوي كوتەرسە، ەكىنشىسى شاھاردىڭ شەتكەرى اۋماعىنداعى ەلدىمەكەن بالالارى ءۇشىن وتە قولايلى جەردەن ورىن تەپكەن. جەر كولەمى 3 گەكتاردان اساتىن مەكتەپ قالانىڭ سولتۇستىك- باتىس ايماعىندا تۇر. مۇندا 175 ادام ەڭبەك ەتۋدە. قۇرىلىس ماتەريالدارىنىڭ بارلىعى قازاقستاندىكى.
«جۇمىستىڭ 95 پايىزى ءبىتىپ تۇر. ىشكى بولىكتى ارلەۋدەمىز. قۇرال- جابدىقتىڭ بارلىعىن قويىپ جاتىرمىز. 20 -تامىز كۇنى تاپسىرامىز مەكتەپتى»، - دەيدى قۇرىلىس جوباسىنىڭ جەتەكشىسى قانات ءاۋتالىپوۆ.
سونىمەن، وبلىس ورتالىعىنداعى ءبىلىم شاڭىراقتارىنىڭ سانى 26 عا جەتكەلى تۇر. وندا 30 مىڭنان استام شاكىرت وقيتىن بولادى. وبلىستا بيىلدان باستاپ الداعى 5 جىلدى قامتيتىن جوسپار بار. ول بويىنشا 53 مەكتەپ قاجەتتىلىككە قاراي كۇردەلى جوندەۋدەن وتەدى نەمەسە قوسىمشا عيماراتتارعا يە بولادى. قازىر 5 مەكتەپتىڭ جوبالىق سمەتالىق قۇجاتتامالارى جاسالۋدا.
