الماتىلىق كەلىنشەك تۇركيادا اۋرۋحانانىڭ قارىزىنان قۇتىلا الماي بالاسىن قالدىرىپ كەتكەن

الماتى. قازاقپارات - تۇركيادا ۋاقىتىنان بۇرىن بوسانىپ قالعان الماتىلىق داريا ۆاسيليەۆا اۋرۋحانانىڭ قارىزىنان قۇتىلا الماي بالاسىن قالدىرىپ كەتۋگە ءماجبۇر بولعان، دەپ حابارلايدى قازاقپارات ءتىلشىسى.

«28 -ماۋسىمدا كۇيەۋىم، قايىن اتام ۇشەۋىمىز تۇركياعا ۇشىپ كەتتىك. سول كەزدە جۇكتىلىگىمە 24 اپتا تولعان. ۇشاقپەن ۇشقاندا ەشقانداي پروبلەما بولعان جوق. 29-30 -ماۋسىم ارالىعىندا جاعدايىم ناشارلاپ كەتتى. ءىشىم قاتتى اۋىردى. جەدەل جاردەم كەلمەدى، ونىڭ ورنىنا جاي كولىك كەلدى»، - دەدى كەلىنشەك.

كەلىنشەك اۋرۋحاناعا بارا جاتقاندا جولدا جانارماي قۇيۋ ستانساسىندا بوسانىپ قالعان.

«سول كەزدە ماعان جەدەل جاردەم شاقىرىلدى. مەن كورگەنىمدە بالا ءتىرى ەدى. 700 گرامدىق شاقالاقتى ينكۋباتورعا سالىپ، انتالياعا جىبەردى. ال مەن گينەكولوگيا بولىمىنە جاتتىم»، - دەدى كەلىنشەك.

تۇرىك دارىگەرلەرى وتباسىنان 3,5 مىڭ ا ق ش دوللارىن تولەۋدى تالاپ ەتكەن.

«بالانى بىزگە كورسەتپەدى. ونى ارزانىراق اۋرۋحاناعا جىبەردى. كۇيەۋىمە ەگەر اقى تولەمەسەڭدەر، ءتولقۇجاتتارىڭدى تارتىپ الىپ، سىرتقا ءبىر ادامدى عانا جىبەرەمىز دەدى. ءبىز قولىمىزدا بولعان 1,5 مىڭ دوللاردى بەردىك»، - دەدى داريا ۆاسيليەۆا.

قازاقستان ازاماتتارى كەلگەن سوڭ تۇرىك كونسۋلدىعىنا حابارلاسىپ، بالاسىنىڭ جاعدايىن بىلمەك بولعان.

17 -شىلدەدە دارياعا قازاقستاننىڭ انتالياداعى وكىلى حابارلاسىپ، تولەيتىن اقشا جوق بولسا، بالادان باس تارتۋى كەرەكتىگىن ايتقان.

قازاقستانعا ۇشۋ ۋاقىتى تاياپ قالعان سوڭ امال جوق بالانى تاستاپ كەتۋگە ءماجبۇر بولعان.

25 -شىلدەدە ولاردىڭ تۇرىك اۋرۋحاناسىنا بەرەشەگى 15 مىڭ ا ق ش دوللارىنا جەتكەن.

ق ر س ءى م باسپا ءسوز قىزمەتى حابارلاعانداي، ايەل بوسانعان سوڭ بالاسىن قالدىرىپ كەتە بەرگەن.

«بالا شالا تۋعاندىقتان، وعان وتە قىمبات كۇتىم كورسەتىلىپ جاتىر. تۇرىك دارىگەرلەرىنىڭ ايتۋىنشا، وتباسى بالانىڭ ەمىنەن باس تارتىپ، بايلانىس تەلەفوندارىن قالدىرماي كەتە بەرگەن»، - دەدى باسپا ءسوز قىزمەتىنەن.

قۇزىرلى ورگان حابارلاعانداي، بالانىڭ اتا-اناسى قازاقستانعا كەلگەن سوڭ تۇركيا كونسۋلدىعىنان بالانىڭ ولگەنى تۋرالى انىقتاما سۇراتقان.

«بالا قازىرگى تاڭدا سول اۋرۋحانادا جاتىر. جاعدايى ءبىرقالىپتى جاقسى، تەك ءالى دە كۇتىم قاجەت ەتەدى. بالانىڭ اتا-اناسى بالانى الدىرامىز دەسە، قۇجات جاعىنان كومەكتەسۋگە دايىنبىز»، - دەدى ق ر س ءى م باسپا ءسوز قىزمەتى.