قىتايدان كەلىپ وليمپيادا چەمپيونى اتانعان مايا مانەزا مەديتسينالىق ورتالىق اشتى
ول باپكەرلىكتەن گورى، مەديتسينا سالاسىن تاڭداۋدى ءجون كورىپتى.
بۇل تۋرالى «دوماشنيي وچاگ» باسىلىمىنا سىلتەمە جاساپ Stan.kz حابارلايدى.
مايا مانەزا مەديتسينا سالاسىنا ويىسۋىنىڭ سەبەبىن ءومىرىنىڭ كوپ بولىگى قىتايدا وتكەندىگىمەن ءتۇسىندىردى. اسپان استى ەلىندە شىعىس مەديتسيناسىنىڭ قانشالىقتى دامىعانىن كوزىممەن كوردىم، دەيدى سپورتشى.
«سونىمەن قاتار كۇيەۋىم ۆياچەسلاۆ ەرشوۆ ەكەۋىمىز قازاقستاننىڭ اۋىر اتلەتيكا بويىنشا قۇراماسىنىڭ قۇرامىندا بولعان ەدىك. ول جەردە ءبىزدىڭ العان جاراقاتىمىزدى ەمدەيتىن، كوپ كۇش تۇسكەن كەزدە قالپىنا كەلتىرەتىن قىتاي دارىگەر بولدى. شىعىس مەديتسيناسىنىڭ نە ەكەنىن ءوز تاجىريبەمىزدەن بىلگەندىكتەن، مەديتسينالىق ورتالىق اشۋدى ۇيعاردىق. باستاپقىدا سپورتتىق مەديتسيناعا باعىتتالماقشى ەدىك. الايدا انىقتالعانداي، قاراپايىم ادامدار دا بىزدە ەمدەلگىسى كەلەدى ەكەن.
سونداي-اق، ءبىز قايىرىمدىلىقپەن اينالىسامىز. ارداگەرلەرگە، مۇمكىندىگى شەكتەۋلى جاندارعا كومەكتەسەمىز»، - دەيدى مانەزا.
مايا مانەزانىڭ سوزىنشە، ورتالىقتاعى دارىگەر قىتايدان كەلگەن.
«ءبىزدىڭ باس دارىگەرىمىز - قىتايلىق. ونىڭ مەديتسينالىق ءبىلىمى جەتكىلىكتى، شىعىس مەديتسيناسى سالاسىندا 40 جىلدىق تاجىريبەسى بار.
ايتا كەتسەك، ءدال قىتايدان لايىقتى ماماندى تابۋ قيىن بولدى. سەبەبى جاقسى دارىگەرلەر قىتايدا ءجۇرىپ-اق جاقسى تابىس تاۋىپ وتىرعاندا، ولارعا وتباسىن تاستاپ، ءتىل بىلمەستەن قازاقستانعا كەلۋدىڭ نە كەرەگى بار؟ ءبىزدىڭ كلينيكامىز دايىن بولعاننىڭ وزىندە، دارىگەر تابا الماعاندىقتان، جارتى جىل بويى اشپادىق»، - دەيدى وليپيادا چەمپيونى.
