ەسكەرتكىش، تۋرنير، كىتاپ: دەنيستىڭ ەسىمىن ەستەن شىعارماس ءۇشىن نە جاسالادى؟
قالا اكىمى الماتىدا مانەرلەپ سىرعاناۋدان دەنيس تەن اتىنداعى تۋرنير ۇيىمداستىرىلاتىنىن ايتتى.
«دەنيس تەننىڭ قازاسى بۇكىل قازاقستاندىقتاردى دۇرلىكتىرىپ قانا قويماي، بىرىكتىردى. مەن دەنيستىڭ اتا-اناسىمەن ەكى رەت اڭگىمەلەستىم. الدىڭعى كۇنى تاعى دا جۇزدەستىم. قالا اكىمدىگى مانەرلەپ سىرعاناۋدان دەنيس تەن اتىنداعى تۋرنير ۇيىمداستىراتىن بولدى. حالىقارالىق دوداعا جاس سپورتشىلار قاتىسادى. الماتى - قىسقى سپورتتىڭ ورتالىعى. سوندىقتان، بۇل تۋرنير قالاعا كەرەك»، - دەدى ب. بايبەك.
سونىمەن قاتار، دەنيس تەننىڭ رۋحىنا ارناپ سپورتشى كوز جۇمعان جەرگە ەسكەرتكىش ورناتىلادى.
«ءبىز ەسكەرتكىشتىڭ ەڭ وزىق ۇلگىسىن انىقتاۋ ءۇشىن مۇسىنشىلەر اراسىندا بايقاۋ جاريالايمىز. قازىر وسى باعىتتا دەنيس تەننىڭ تۋىستارىنىڭ قاتىسۋىمەن كوميسسيا قۇرىلدى»، - دەدى اكىم.
سونداي-اق، دەنيس تەن تۋعان ۇيگە ەسكەرتكىش تاقتا ورناتىلىپ، كىتاپ جازىلادى.
«تۋىسقاندارىندا دەنيس تەن تۋرالى بارلىق مالىمەت بار. ونى كىتاپ ەتىپ جازۋ ءۇشىن بارىنشا قارجىلىق كومەك كورسەتەمىز. وسى ماسەلەلەردىڭ بارلىعى مەنىڭ جەكە باقىلاۋىمدا بولادى»، - دەدى اكىم.
مۇنىڭ الدىندا دەنيس تەننىڭ اناسى ق ر مادەنيەت جانە سپورت مينيسترلىگى مانەرلەپ سىرعاناۋ اكادەمياسىن اشۋدى جوسپارلاپ وتىرعانىن ايتقان بولاتىن.
