تۇركىستان وبلىسىنداعى تاۋ شىڭدارىنا ءۇش ءبيدىڭ ەسىمى بەرىلەدى

تۇركىستان. قازاقاپارت - بۇگىن تۇركىستان وبلىسىندا «بۇل - ءبىزدىڭ تاۋلار!» فەستيۆالى باستالدى، دەپ حابارلايدى قازاقپارات وبلىس اكىمىنىڭ باسپا ءسوز قىزمەتىنە سىلتەمە جاساپ.

ءۇش كۇنگە سوزىلاتىن ءىس-شارا «سايرام-وگەم» مەملەكەتتىك تابيعي ۇلتتىق پاركىنىڭ اۋماعىندا وتەدى. وبلىس اكىمدىگىنىڭ ۇيىمداستىرۋىمەن قولعا الىنعان فەستيۆالگە قاراعاندى، اقتوبە، تۇركىستان وبلىستارىنان جانە شىمكەنت قالاسىنان 30 عا جۋىق الپينيست ارنايى كەلگەن. بيىك شىڭداردى باعىندىرۋعا بەت العان الپينيستەرگە تۇركىستان وبلىسىنىڭ اقساقالدارى باتاسىن بەرىپ، سالتاناتتى تۇردە شىعارىپ سالدى.

بۇل ءىس-شارانىڭ ماقساتى - ىشكى، سپورتتىق-ەكولوگيالىق تۋريزمدى دامىتۋ، وبلىستىڭ تۋريستىك الەۋەتىن ناسيحاتتاۋ جانە «رۋحاني جاڭعىرۋ» باعدارلاماسىن جۇزەگە اسىرۋ.

بيىلعى فەستيۆال قازاق حالقىنىڭ ۇلى قايراتكەرلەرى - تولە، قازىبەك جانە ايتەكە بيگە ارنالعان. ەلباسىنىڭ «رۋحاني جاڭعىرۋ» باعدارلاماسى اياسىندا 3 شىڭعا 3 ءبيدىڭ اتى بەرىلىپ، الپينيستەر سول 3 شىڭدى باعىندىرادى.

فەستيۆال اياسىندا ۆەلوشەرۋ جانە ۇلتتىق سپورت تۇرلەرىنەن سايىستار وتەدى. سونىمەن قاتار، كونسەرتتىك باعدارلاما دا بار.