بۋرابايدا جاس عالىمداردىڭ حالىقارالىق فورۋمى ءوتتى
«Burabay Forum: قازاقستاننىڭ حالىقارالىق ىنتىماقتاستىعى» تاقىرىبىندا وتكەن فورۋمعا ەلباسى قورىنىڭ اتقارۋشى ديرەكتورىنىڭ ورىنباسارى يگور روگوۆ، قازاقستان رەسپۋبليكاسىنىڭ ءبىلىم جانە عىلىم ۆيتسە-ءمينيسترى تالعات ەشەنقۇلوۆ، Kazakh Tourizm ۇلتتىق كومپانياسىنىڭ جەتەكشىسى راشيد كۇزەمبايەۆ، اقمولا وبلىسى اكىمىنىڭ ورىنباسارى قانات ىدىرىسوۆ، ت م د جانە ەلىمىزدەن كەلگەن جاس عالىمدار قاتىستى.
فورۋمدا ەلىمىزدىڭ ەۋرازيالىق كەڭىستىكتەگى بولاشاعى ايتىلدى. سونداي-اق، تۋريزم، اۋىل شارۋاشىلىعى، عىلىم مەن مادەنيەت، فيزيكا جانە عىلىمدى قاجەت ەتەتىن تەحنولوگيالار سالاسىنداعى ىنتىماقتاستىقتى ودان ءارى دامىتا تۇسۋگە قاتىستى ءوز پىكىرلەرىن ورتاعا سالدى. «كەلەشەكتە عىلىمدى قاي باعىتتا دامىتۋ قاجەت، وسى ىستە جاس عالىمداردىڭ ءرولى قانداي بولماقشى؟» دەگەن ساۋالدار توڭىرەگىندە كوپتەگەن ويلار ايتىلدى. فورۋمنىڭ وتكىزىلۋىنە وتكەن جىلى ەلباسى قورى مەن اقمولا وبلىسىنىڭ اكىمدىگى اراسىندا ىنتىماقتاستىق جونىندەگى مەموراندۋم سەبەپ بولىپ وتىر.
ايتا كەتەيىك، فورۋم تامىز ايىنىڭ 8 ءى كۇنى ەلوردامىز - استانا قالاسىندا باستالىپ، وندا ءبىرقاتار مينيسترلىكتەردىڭ وكىلدەرى، جوعارى وقۋ ورىندارىنىڭ رەكتورلارى بايانداما جاساعان بولاتىن. كەلەسى كۇنى بۋرابايدا جالعاسقان فورۋمنىڭ پلەنارلىق وتىرىسىندا ەلىمىزدىڭ تۇكپىر-تۇكپىرىنەن جانە شەتەلدەردەن كەلگەن زەرتتەۋشىلەر سپيكەرلەرگە ساۋالدارىن قويىپ، تۇشىمدى جاۋاپتار الدى. جيىندى قازاقستان رەسپۋبليكاسىنىڭ تۇڭعىش پرەزيدەنتى - ەلباسى قورىنىڭ الماتى قالاسىنداعى وكىلدىگىنىڭ ديرەكتورى سەرگەي توقتاروۆ اشىپ، جۇرگىزىپ وتىردى. فورۋم اياسىندا وتكەن سەكتسيالىق وتىرىستاردا قاتىسۋشىلار تاجىريبەلەرىمەن بولىسۋگە مۇمكىندىك الدى.
قازاقستان رەسپۋبليكاسىنىڭ ءبىلىم جانە عىلىم ۆيتسە-ءمينيسترى تالعات ەشەنقۇلوۆ بۇقارالىق اقپارات قۇرالدارى وكىلدەرىنە بەرگەن سۇحباتىندا بۇگىنگى تاڭدا عىلىم سالاسىن دامىتۋعا ەلىمىزدە زور كوڭىل ءبولىنىپ وتىرعاندىعىن، مەملەكەتىمىزدە جاس عالىمداردى الەۋمەتتىك قورعاۋ جاقسى جولعا قويىلعاندىعىن ايتىپ ءوتتى. ولارعا قازاقستان رەسپۋبليكاسى ءبىلىم جانە عىلىم مينيسترلىگىنىڭ باستاماسىمەن وتكەن جىلى جانە بيىل 120 پاتەردىڭ كىلتى تاپسىرىلعان ەكەن.
«ەلىمىزدەگى عىلىمدى دامىتۋ، قارجىلاندىرۋ جۇيەسى باسقا ەلدەرگە قاراعاندا ەدەۋىر الدا كەلە جاتىر دەپ نىق سەنىممەن ايتا الامىن. فورۋمعا شەتەلدەردەن كەلگەن مەيماندار ءبىزدىڭ جۇيەمىزدى زەرتتەۋگە قىزىعۋشىلىق تانىتىپ وتىر»، - دەدى ۆيتسە-مينيستر تالعات ەشەنقۇلوۆ.
فورۋم سوڭىندا بارلىق قاتىسۋشىلارعا سەرتيفيكاتتار تابىس ەتىلىپ، بۋرابايدىڭ كورىكتى جەرلەرىنە ساياحات ۇيىمداستىرىلدى.
