قازاقستاندا استىق ونىمدىلىگى نەگە تومەن

«شىنىمەن دە، بيدايدىڭ ۇلەسى ەگىس القاپتارى قۇرىلىمىندا 55 پايىزدان استام. ال ىشكى قاجەتتىلىككە 9-9,5 ميلليون توننا كولەمىندە كەرەك، ونىڭ ىشىندە جەم جانە تۇقىم قورى دا بار. وتكەن جىلى 20 ميلليون توننا استىق باستىرىلسا، سونىڭ 15 ميلليون تونناعا جۋىعى بيداي. بۇل رەتتە استىق پەن ۇن ەكسپورتىن ەسكەرە وتىرىپ، جىل سايىن 7-8 ميلليون توننا سىرتقا شىعارىپ كەلەمىز. سوڭعى 5 جىلدا ورتاشا ونىمدىلىك گەكتارىنان 12 سەنتنەردەن اسپادى، ياعني بۇل كورسەتكىش 1 توننادان ءسال استام. وتكەن جىلمەن قاراساق، ءبىر گەكتارعا جۇمسالاتىن شىعىندار 35-40 مىڭدى قۇرايدى. سونىمەن قاتار، ءونىم قۇنى دا سول دەڭگەيدە بولدى. گەكتارىنان ءبىر توننانى الا وتىرىپ، تەك جۇمساعان شىعىنداردى عانا وتەپ وتىردى»، - دەدى «اتامەكەن» ۇ ك پ اگروونەركاسىپتىك كەشەن جانە تاماق ونەركاسىبى دەپارتامەنتى ديرەكتورىنىڭ ورىنباسارى جاننا اقىشەۆا.
ونىڭ سوزىنە قاراعاندا، باسقا ەلدەردە جاۋىن-شاشىننىڭ ءدال وسى دەڭگەيىندە استىق شىعىمدىلىعى گەكتارىنان 3-5 تونناعا دەيىن جەتەدى.
ۇ ك پ وكىلدەرىنىڭ مالىمەتىنشە، سوڭعى جىلدارى رەسەيدە ءتيىمدى تەحنيكا مەن جاقسى تۇقىمدى پايدالانۋ ەسەبىنەن استىق ونىمدىلىگى كۇرت ارتتى.
«بۇل نەنى بىلدىرەدى؟ بالامالى نۇسقا رەتىندە جوعارى تابىس اكەلەتىن داقىلدارعا كوشۋ كەرەك، ياعني زىعىر، راپس، جاسىمىق، كارتوپ ەگۋگە بەتبۇرىس جاساعان ءجون»، - دەدى ج. اقىشەۆا.
ونىڭ ايتۋىنشا، ءبىر گەكتار كارتوپتى وسىرۋگە شامامەن 450 مىڭ تەڭگە جۇسالادى. ال ءبىر توننا كارتوپتان تۇسەتىن پايدا 55 تەڭگەنى قۇرايدى. ورتاشا العاندا، ءبىر گەكتاردان 25 توننا كارتوپ وسىرۋگە بولادى.
«وسى تەكتەس ءونىمدى جوعارىدا اتالعان داقىلداردان دا الۋ مۇمكىندىگى بار. بۇل بالامالى نۇسقالار، سايكەسىنشە، تابىسى جوعارى داقىلدارعا كوشۋ كەرەك. سونىمەن قاتار، اتالعان داقىلدار ەكسپورتقا نەگىزدەلگەندىكتەن، جوعارى جالپى تابىستى بەرەدى جانە شىعىنداردىڭ وزىندىك قۇنى دا تومەن»، - جاننا اقىشەۆا.