سولتۇستىكتە كۇن سۋىتىپ، جاۋىن- شاشىن بولادى

استانا. قازاقپارات - الداعى ءۇش كۇندە جاڭبىر جاۋىپ، كۇن كۇركىرەيدى، دەپ حابارلايدى قازاقپارات قازگيدرومەتكە سىلتەمە جاساپ.

9-11- تامىز ارالىعىندا كارسك تەڭىزى اۋداندارىنان سۋىق، ىلعالدى اركتيكالىق اۋا كەلەدى. وسىعان بايلانىستى قازاقستاننىڭ سولتۇستىك جانە ورتالىق ايماقتارىندا جاڭبىر جاۋادى. ال 11- تامىزدا وسى وڭىرلەرمەن قوسا ەلىمىزدىڭ شىعىسىندا دا جاۋىن-شاشىن كۇتىلەدى. كەي جەرلەردە كۇن قاتتى كۇركىرەيدى جانە ەكپىندى جەل سوعادى، بۇرشاق ءتۇسۋى مۇمكىن.

سولتۇستىك، ورتالىق ايماقتاردا اۋا تەمپەراتۋراسى تۇندە 7-17 گرادۋسقا دەيىن سالقىنداپ، كۇندىز 15-23 گرادۋس جىلى بولادى.

رەسپۋبليكانىڭ قالعان اۋماعىندا اۋا تەمپەراتۋراسى بۇرىنعى قالپىندا ساقتالادى. كەي جەرلەردە كۇن كۇركىرەپ، جاڭبىر جاۋادى. 11- تامىزدا ەلىمىزدىڭ وڭتۇستىگىندە كەي جەرلەردە جەل كۇشەيىپ، شاڭدى داۋىل تۇرادى. بۇرشاق جاۋۋى مۇمكىن.