كاسپي تەڭىزى كرۋيزدىك تۋريزم ورتالىعى بولا الادى
بۇل ۇسىنىستى Kazakh Tourism وكىلى تۋريزم بويىنشا تۇركى كەڭەسى جۇمىس توبىنىڭ 13- وتىرىسىندا كوتەردى.
«تۇركى ەلدەرىنىڭ ورتاق تۋريستىك باعىتتارىن قولدانۋدا ءالى دە ەگجەي- تەگجەيلى تالقىلايتىن ماسەلەلەر بار. مىسالى، ازەربايجان مەن تۇركيا بىرگە ازىرلەگەن ورتاق ءونىمىن تۋريستەرگە ساتا الادى. ال ازەربايجان- تۇركيا جانە قازاقستان- قىرعىزستان ەلدەرىنە ارنالعان باعدارلاما - وتە كۇردەلى جانە بۇل ءونىم تۋريستىك نارىقتا وتپەۋى مۇمكىن. سوندىقتان، ءىس جۇزىندە تۋريستەرگە ىڭعايلى ونىمدەردى ازىرلەۋگە ءمان بەرگەن ءجون»، - تيمۋر دۇيسەنعاليەۆ استانادا Hilton قوناق ۇيىندە وتكەن كەزدەسۋدە.
ونىڭ ايتۋىنشا، كاسپي تەڭىزى كرۋيزدىك ساپاردىڭ جاڭا ءبىر ورتالىعى بولا الادى.
«ەگەر ازەربايجان- قازاقستان تىزبەگىن الساق، كاسپي بويىنشا كرۋيز ۇيىمداستىرۋ ءتيىمدى. بۇل جوبا نارىقتا سۇرانىسقا يە بولار ەدى، سەبەبى تاياۋ شىعىس جاقىن ورنالاسقان. جانە وعان كورشىلەس رەسەي، يران، تۇركمەنستاندى دا شاقىرۋعا بولادى. قازىرگى ۋاقىتتا ت م د ازاماتتارى كرۋيز ساپارى ءۇشىن جەرورتا تەڭىزىنە بارىپ ءجۇر. سوندىقتان، جاقىن ورنالاسقان كاسپي تەڭىزى دە كرۋيزدى دامىتۋدىڭ ءبىر ورتالىعى بولا الادى»، - دەدى تيمۋر دۇيسەنعاليەۆ.
ايتا كەتەيىك، 8 - تامىز كۇنى استانادا تۇركى كەڭەسىنە مۇشە مەملەكەتتەردىڭ تۋريزم مينيسترلەرىنىڭ ءتورتىنشى جيىنى وتەدى.
تاراپتار «تۇركى كەڭەسى - زاماناۋي جىبەك جولى» بىرلەسكەن تۋريستىك ءونىمىنىڭ جوباسىن ىسكە قوسۋ مەن كوممەرتسيالىق جۇزەگە اسىرۋعا دايىندىق جۇمىستارىن تالقىلايدى. سونىمەن بىرگە، كەزدەسۋ بارىسىندا زاماناۋي جىبەك جولى بويىنشا بىرلەسكەن تۋر جونىندەگى دەرەكتى فيلمنىڭ تانىستىرىلىمى وتەدى.
اۆتور: ايجان سەرىكجان قىزى
