باياناۋىل كۋرورتتىق ايماعىنداعى اۋەجاي قۇرىلىسى اياقتالۋعا جاقىن
«تارتىلعان ينۆەستيتسيالار ەسەبىنەن ۇزىندىعى 1200 مەتر جانە ەنى 21 مەتر بولاتىن ۇشۋ-قونۋ جولاعى سالىندى. سونداي-اق، جۋىق ارادا جولاققا شىعۋ جولدارى مەن پەرون سالىنىپ، ەلەكترمەن قامتاماسىز ەتۋ نىساندارىنىڭ جانە اەرودرومنىڭ قورشاۋ جۇمىستارى اياقتالادى. جولاۋشىلاردىڭ جايلىلىعى ءۇشىن اۋدانى 200 شارشى مەتر عيمارات سالىنعان. تىكۇشاقتىڭ قونۋىنا ارنالعان ەكى الاڭ دايىندالدى» دەلىنگەن حابارلامادا.
مالىمەتكە ساي، قازىرگى ۋاقىتتا «قازاەروناۆيگاتسيا» ر م ك- نىڭ ماماندارى باياناۋىل اەرودرومىنا ۇشۋدى باقىلاۋدىڭ موبيلدى ورتالىعىن ورناتۋ بويىنشا جۇمىستاردى جۇرگىزۋدە. مەتەورولوگيالىق جابدىقتاردى، راديوناۆيگاتسيالىق قۇرالداردى جانە بايلانىس جۇيەلەرىن ورناتۋ شارالارى دا قاراستىرىلعان.
بۇعان دەيىن حابارلانعانداي، كەلەسى تۋريستىك ماۋسىمدا استانا-باياناۋىل، الماتى-باياناۋىل، پاۆلودار-باياناۋىل رەيستەرىن اشۋ جوسپارلانىپ وتىر. جوعارىدا كورسەتىلگەن باعىتتاردا ايماقتىق اۆياتسيانىڭ ۇشاقتارىن پايدالانۋ كوزدەلىنىپ وتىر.
