قازاقستاننىڭ ونەر جۇلدىزدارى حان ءتاڭىرى شىڭىنا شىقتى
ولار قىزىعىنان قيىندىعى كوپ ساپارى جايلى باسپا ءسوز ءماسليحاتىندا ايتىپ بەردى، دەپ حابارلايدى قازاقپارات ءتىلشىسى.
ەكى اپتاعا سوزىلعان مەدياەكسپەديتسياعا اكتەرلاردان بولەك «جەتىسۋ» گەوگرافيالىق قاۋىمداستىعىنىڭ جەتەكشىسى ءانۋار دەمەگەنوۆ پەن ءارى سپورتشى، ءارى وپەراتور الەكساندر كۋزنەتسوۆ قاتىستى.
اكتەر ءانۋار نۇرپەيىسوۆ تىلشىلەرگە بەرگەن سۇحباتىندا حان ءتاڭىرى شىڭىنا كوتەرىلۋ ءومىر مەن ءولىم اراسىنداعى ارپالىس دەپ باعالادى. تالانتتى جۇلدىز تەڭىز دەڭگەيىنەن 4 مىڭ مەتر بيىكتىكتەن اسقان كەزدە ءومىردى قادىرلەۋدى ۇيرەنگەنىن جاسىرمادى.
قازاقستاننىڭ ونەر جۇلدىزدارى حان ءتاڭىرى شىڭىنا شىقتىال ايسۇلۋ ازىمبايەۆا ەلىمىزدەگى ەڭ بيىك شىڭدى باعىندىرۋ بۇل ۇلكەن عىلىم دەپ باعالادى.
«كەز كەلگەن ادام يىعىنا 15-20 كەلى جۇكتى اسىنا سالىپ تاۋعا شىعا المايدى. ول ءۇشىن ۇزاق فيزيكالىق جانە جۇيكە دايىندىعى قاجەت دەيدى»، - دەيدى ايسۇلۋ ازىمبايەۆا.
بۇل ساپارىندا ءانۋار نۇرپەيىسوۆ 5400 مەتر بيىكتىكتى مىسە تۇتسا، نازىك جاندى ايسۇلۋ 6 مىڭ مەتر بيىكتىككە كوتەرىلە العان. اۋا رايى ويداعىداي بولسا دا، شىڭنىڭ ەڭ بيىك نۇكتەسىنە جەتۋگە مەدياەكسپەديتسياداعى ەشكىمنىڭ شاماسى جەتە قويماعان. ولار ونىڭ سەبەبى دايىندىقتا دەپ ءتۇسىندىردى.
سەبەبى كاسىبي الپينيستەر مۇنداي بيىكتىكتەرگە جىلدار بويى دايىندالىپ كوتەرىلەدى. ال بىزگە ۋاقىت تىعىز بولدى، دەيدى ەكسپەديتسيا مۇشەلەرى. دەگەنمەن، بولاشاقتا جوبا جالعاسىپ جاتسا، تاۋەكەل دەپ تاعى ءبىر مۇمكىندىكتەرىن سىناپ كورۋگە دايىن ەكەندىكتەرىن جەتكىزدى.
20 گرادۋس سۋىقتا تۇنەپ، قار كوشكىندەرىن ءوز كوزدەرىمەن كورگەن ونەر يەلەرى بۇل ساپارى جايىندا دەرەكتى فيلم شىعارۋدى جوسپارلاپ وتىر.
