استانادا تەلەفون ۇرلىعى ءۇشىن قانشا ادام ۇستالعانى بەلگىلى بولدى
«اعىمداعى جىل باسىنان بەرى استانا قالاسىنىڭ پوليتسەيلەرى ۇيالى تەلەفون ۇرلىقتارىنىڭ 586 فاكتىسىن اشتى. ۇيالى تەلەفونداردى ۇرلاعان 512 ادام ۇستالدى. پوليتسەيلەر ازاماتتاردان جەكە مۇلكىن ساقتاۋعا وتە ساق بولۋىن، كوپ ادامدار جينالعان ورىنداردا زاتتارىن قاراۋسىز قالدىرماۋىن، ۇيالى تەلەفون ۇرلانعان جاعدايدا شۇعىل تۇردە پوليتسياعا حابارلاۋىن سۇرايدى»، - دەلىنگەن ءى ءى د مالىمەتىندە.
سونىمەن قاتار پوليتسەيلەر تەلەفون ساتىپ العاننان كەيىن ونىڭ قورابىن ساقتاپ قويۋدى نەمەسە IMEI ءنومىرىن جازبا كىتاپشاسىنا جازىپ قويۋعا كەڭەس بەردى. سەبەبى وسى ءنومىردىڭ بار بولۋى قىلمىستىڭ ءىزىن سۋىتپاي اشۋعا مۇمكىندىك بەرەدى.
ەگەر تەلەفوننىڭ شوتىندا كوپ اقشا بولسا، وندا ۇيالى بايلانىس وپەراتورىنا حابارلاسىپ، ءنومىردى بۇعاتتاۋ قاجەت. «ۇيالى تەلەفونداردى ۇرلاۋ بۇگىنگى تاڭدا ەڭ كوپ تاراعان قىلمىس ءتۇرى بولىپ وتىر. ۇرلىق كوبىنەسە ادامدار كوپ جينالاتىن ورىنداردا (ساياباقتا، ساۋدا ۇيلەرىندە، قوعامدىق كولىكتەردە، ويىن-ساۋىق مەكەمەلەرىندە، سپورت الاڭدارىندا) جاسالادى. سپورت الاڭدارىندا قاراۋسىز قالعان ريۋكزاكتار مەن سومكەلەر قاسكۇنەمدەر ءۇشىن ەڭ جەڭىل ولجا بولىپ تابىلادى»، - دەيدى پوليتسەيلەر.
كوبىنەسە، الاياقتىق پەن توناۋ جاساۋ كەزىندە ۇيالى تەلەفونداردى جىمقىرۋ ءجيى ورىن الادى. ادامدار كەي كەزدە ءوز تەلەفوندارىن بەيتانىس ادامدارعا قوڭىراۋ شالۋعا بەرەدى، ال ولار بولسا ۇيالى تەلەفوندى الىپ، ءىزىن سۋىتادى. وسىلايشا «الماتى» اۋدانى ءى ءى ب قىزمەتكەرلەرى ازامات م. ۇيالى تەلەفونىن الداۋ ارقىلى يەمدەنگەن كۇدىكتىنى ۇستاعان. ول ۇيالى تەلەفوندى قوڭىراۋ شالۋ ءۇشىن سۇراپ العان جانە تابانىن جالتىراتقان. اتالعان فاكتى بويىنشا «الاياقتىق» بابىمەن سوتقا دەيىنگى تەرگەپ-تەكسەرۋ جۇرگىزىلۋدە. ۇستالعاننىڭ باسقا دا وسىعان ۇقساس قىلمىستارعا قاتىستىلىعى تەكسەرىلۋدە.
