س ق و: ارنايى جاساق اۋە-دەسانتتىق دايىندىقتان ءوتىپ جاتىر

پەتروپاۆل. قازاقپارات - سولتۇستىك قازاقستان وبلىستىق ىشكى ىستەر دەپارتامەنتىنىڭ جىلدام قيمىلدايتىن ارنايى جاساعى اۋە-دەسانتتىق دايىندىعىنان ءوتىپ جاتىر، دەپ حابارلايدى قازاقپارات ءتىلشىسى.

وبلىستىق دەپارتامەنت باسپا ءسوز قىزمەتىنىڭ مالىمدەۋىنشە، كوپتەگەن ءتارتىپ ساقشىلارى العاش رەت پاراشيۋتپەن سەكىرگەن.

«اۋا رايى اۋەدە جاتتىعۋ جاساۋ ءۇشىن قولايسىز بولدى، كۇنى بويى بىرنەشە رەت جاڭبىر جاۋدى. ءبىراق ارنايى جاساق ءۇشىن بۇل ەشقانداي قيىندىق تۋدىرمادى»، - دەيدى باسپا ءسوز قىزمەتىنىڭ وكىلدەرى.

ءتارتىپ ساقشىلارى 800 مەتر بيىكتىكتەن سەكىردى. ولارعا دايىندىق كۋرسىن قاراعاندىلىق تاجىريبەلى ينسترۋكتور ۆيكتور بۋرياچەنكو وتكىزدى. ارنايى جاساق كومانديرى ەرىك قۇلجانوۆتىڭ ايتۋىنشا، اۋەدەگى دەسانتتىق دايىندىق ارنايى جاساقتىڭ اسكەري جانە قىزمەتتىك دايىندىعىنىڭ قۇرامداس بولىگى بولىپ تابىلادى.

«كەز كەلگەن ساتتە وفيتسەر جان-جاقتى دايىن بولۋى، تاپسىرماعا بىردەن كىرىسۋى ءتيىس. بۇل جولى 8 پوليتسەي دايىندىقتان ءوتتى، سونىڭ ەكەۋى بۇرىن پاراشيۋتپەن سەكىرگەن»، - دەيدى ە. قۇلجانوۆ.