عالىمدار جاساندى جۇرەكتىڭ جاڭا ءتۇرىن جاساپ شىعاردى

استانا. قازاقپارات - ەۋروپا ەلدەرى جاساندى جۇرەكتىڭ جاڭا ءتۇرىن سىناقتان وتكىزىپ جاتىر. اتالعان اپپاراتتى ەشبىر سىمسىز ادامعا سالۋعا بولادى. ارنايى سومكەنى ۇستاۋدىڭ قاجەتى جوق. سەبەبى اككۋمۋلياتور باتارەياسى دا ىشىندە ورنالاسقان.

 وسى اپپاراتتى زەرتتەۋ جۇمىستارىنا ق ر ۇلتتىق عىلىمي كارديوحيرۋرگيا ورتالىعى دا اتسىلىسىپ كەلەدى، دەپ حابارلايدى قازاقپارات ءتىلشىسى.

ورتالىق باسشىسى يۋريي پيانىڭ ايتۋىنشا، ازىرشە جاساندى جۇرەكتىڭ جاڭا ءتۇرىن جانۋارلارعا سالىپ ءجۇر. «زەرتتەۋ جۇمىستارى بەلگيا مەن فرانسيادا جۇرگىزىلىپ جاتىر. وعان يزرايل جانە ەۋروپانىڭ باسقا دا مەملەكەتتەرى قاتىسىپ ءجۇر. جاڭا اپپاراتتى ادامعا سالۋ ءۇشىن الدىمەن جانۋارلارعا سالىپ، باقىلاپ كورۋ كەرەك. ءبىز بىرنەشە قويعا جاساندى جۇرەكتىڭ جاڭا ءتۇرىن سالدىق. ولار ەكى جىلدان بەرى سونىمەن ءجۇر. جالپى، بۇل باعدارلامانىڭ باستالعانىنا بەس جىلداي بولدى. الداعى ۋاقىتتا ارنايى كوميسسيا تاجىريبەنىڭ ناتيجەسىن زەردەلەپ، كلينيكانى انىقتايدى. سول جەردە جاساندى جۇرەكتىڭ جاڭا ءتۇرىن يمپلانتاتسياسىنا العاشقى وپەراتسيا جاسالادى. مەنىڭشە، الداعى بەس جىلدا ونى ادامدارعا سالا باستايدى»، - دەدى يۋ. پيا جۋرناليستەرگە بەرگەن سۇحباتىندا.

ونىڭ ايتۋىنشا، جاڭا اپپاراتتىڭ اككۋمۋلياتور باتارەياسى ىشىندە ورنالاسقان. ول ەلەكترماگنيتتى تولقىندار ارقىلى قۋات الادى.

«ادامعا كونتۋر ىسپەتتى «يندۋكتسيالىق كاتۋشكا» كيگىزىلەدى دە، سول ارقىلى ەلەكترماگنيتتى تولقىندار جاساندى جۇرەكتەگى كونتۋرعا بەرىلەدى. سول ارقىلى ەنەرگيا وندىرىلەدى. ءسويتىپ، باتارەيا قۋات جينايدى. جاساندى جۇرەكتىڭ جاڭا ءتۇرى قازاقستاندىقتارعا دا جەتسە ەكەن دەيمىن. بۇل - مەنىڭ ماقساتىم. وزىمە سونداي مىندەت قويدىم. وعان جەتۋىم كەرەك. سودان كەيىن زەينەتكەرلىككە دە شىعۋعا بولادى»، - دەپ اتاپ كورسەتتى يۋ. پيا.

ايتا كەتەيىك، قازاقستاندا تاعى ەكى ادامعا تولىعىمەن جاساندى جۇرەك سالىندى. بارلىق وپەراتسيالار استاناداعى ۇلتتىق عىلىمي كارديوحيرۋرگيا ورتالىعىندا جاسالدى. الايدا  «Carmat SA» ۇلگىسىندەگى اپپاراتتىڭ ارنايى سومكەسى بار. ونىڭ سالماعى - 3 كەلى. ىشىندە اككۋمۋلياتور باتارەياسى جانە باسقا دا داتچيكتەر ورنالاسقان. بارلىعى سىمدار ارقىلى جاساندى جۇرەككە جالعانىپ تۇرادى.

 بۇگىن ۇلتتىق عىلىمي كارديوحيرۋرگيا ورتالىعىنىڭ ماماندارى تاعى ءبىر وپەراتسيانىڭ ءساتتى جاسالعانىن مالىمدەدى. 60 جاستاعى قۇنانباي ابىرايەۆكە دونورلىق جۇرەك سالىندى. ونداي وپەراتسيا الەم بويىنشا العاش رەت جاسالىپ وتىر. وعان الدىمەن جاساندى جۇرەك سالىندى، ارتىنان ونى دونورلىق جۇرەكپەن اۋىستىردى.

اۆتور: ارمان اسقاروۆ