باس پروكۋراتۋرا ءابليازوۆتى تەرگەۋگە شاقىردى

استانا. قازاقپارات - قازاقستاننىڭ باس پروكۋراتۋراسى شەتەلدە تۇراتىن وپپوزيتسيالىق ساياساتكەر، ەكس-بانكير مۇحتار ءابليازوۆتى بانكير ەرجان تاتىشوۆتىڭ ولىمىنە قاتىستى تەرگەۋگە شاقىردى. شاقىرتۋ تۋرالى اقپارات پروكۋراتۋرانىڭ رەسمي سايتىندا جاريالانعان.

باس پروكۋراتۋرا اسا اۋىر قىلمىس جاساۋ فاكتىسى بويىنشا ءابليازوۆقا قاتىستى قىلمىستىق ءىستى تەرگەپ جاتقانىن مالىمدەدى.

شاقىرتۋداعى مالىمەت بويىنشا، كۇدىكتى مۇحتار ءابليازوۆ 16- تامىزعا دەيىن استاناداعى باس پروكۋراتۋراعا كەلۋى ءتيىس.

قازاقستان باس پروكۋراتۋراسى 4- ساۋىردە قۋعىنداعى ساياساتكەر مۇحتار ءابليازوۆتىڭ ۇستىنەن «بانكير ەرجان تاتىشوۆتى ءولتىرۋدى ۇيىمداستىردى» دەگەن ايىپپەن قىلمىستىق ءىس قوزعاعان.

وسىدان كەيىن مۇحتار ءابليازوۆ ازاتتىققا ەرجان تاتىشوۆ ولىمىنە قاتىستى تەرگەۋگە جانە سوتقا قاتىسۋعا دايىن ەكەنىن مالىمدەگەن. ول سوتقا تاتىشوۆ ولىمىنە قاتىسى بار دەپ سوتتالعان مۇراتحان توقمادي كەلسە عانا وتىرىستارعا ۆيدەو ارقىلى تىكەلەي قوسىلاتىنىن ايتقان.

2004-جىلى جەلتوقساندا اڭعا شىققاندا مەرت بولعان ەرجان تاتىشوۆتىڭ قازاسىنان كەيىن «تۇران الەم» بانكى باسشىلىعى قايعىلى وقيعانىڭ ساياسي استارى جوق ءارى باسەكەلەستىك تارتىستىڭ كەسىرى دەپ سانامايتىندارىن مالىمدەگەن. ال 2017-جىلى قۇزىرلى ورگاندار «كازسترويستەكلو» كومپانياسىنىڭ بۇرىنعى يەسى مۇراتحان توقمادي «ەرجان تاتىشوۆتى اڭعا شىققاندا قاساقانا ولتىرگەنىن جانە وزىنە تاپسىرىستى مۇحتار ءابليازوۆ بەرگەنىن مويىنداعانىن» مالىمدەگەن.

جامبىل وبلىستىق سوتى 16- ناۋرىزدا «تۇران الەم بانك» باسشىسى ەرجان تاتىشوۆتىڭ قازاسى بويىنشا بيزنەسمەن مۇراتحان توقماديدى ايىپتى دەپ تانىپ، 10 جىل 6 ايعا سوتتاعان.

«ازاتتىق»