تالعات تەمەنوۆ «ماحاببات بەكەتىنىڭ» جالعاسىن ءتۇسىرىپ جاتقان بايان الاگوزوۆاعا شۇيلىكتى

استانا. قازاقپارات - «ماحاببات بەكەتى» فيلمىنىڭ رەجيسسەرى تالعات تەمەنوۆ  فيلمنىڭ جالعاسىن ءتۇسىرىپ جاتقان بايان الاگوزوۆاعا رەنىشىن ايتتى.

 بۇل تۋرالى Аbai.kz  سايتى حابارلايدى.

«سەنەسىڭ بە، مەن وسى اقپاراتتى سول فيلمدى ءتۇسىرىپ جاتقانداردان ەمەس، ايدالاداعى بىرەۋلەردەن ەستىدىم. جاسىرمايمىن، ەستىپ تاڭ قالدىم. ءتىپتى، ۇياتتاۋ بولدى.

«ماحاببات بەكەتى» ول - مەنىڭ فيلمىم. ونى مەن ايتپاسام دا، كوزىقاراقتى جۇرت جاقسى بىلەدى. ءتىپتى، كەرەك دەسەڭىز، مەن «ماحاببات بەكەتى» فيلمىنىڭ رەجيسسەرى، سسەناري اۆتورى عانا ەمەس، پوۆەستتىڭ دە اۆتورىمىن. ول فيلم مەنىڭ پوۆەستىمنىڭ جەلىسىندە ءتۇسىرىلدى عوي.

ايتپاقشى، بىلتىر ماعان بايان حابارلاستى. اناۋ ءبىر قايعىلى وقيعادان كەيىن، اۋرۋحانادان شىققان كەزى ەكەن. حابارلاسىپ، «تالعات دوسىمعاليەۆيچ، ءبىر بومبا دۇنيە جاسايىق» دەپ، وسى «ماحاببات بەكەتىنىڭ» جالعاسىن ءتۇسىرۋ تۋرالى ايتتى. ءازىل- شىنى ارالاس اڭگىمەمىزدەن كەيىن، مەن «كورەيىك» دەپ قويا سالدىم»، - دەيدى رەجيسسەر.

تەمەنوۆتىڭ ايتۋىنشا، الاگوزوۆانىڭ كومەكشىسى وعان ءبىر رەت حابارالاسقان. ءبىراق ول كەلىسىمىن بەرمەپتى. حابارلاسقان ادام ونىڭ كەلىسىمى كەرەك ەمەس ەكەنىن ايتقان.

«ودان كەيىن، ول مەنىڭ كومەكشىممەن ءبىر مارتە عانا سويلەسكەن. ءبىز فيلم تۇسىرۋگە كەلىسىمىمىزدى بەرمەدىك. سوندا ولار: «ءبىز وسىعان قاراپ قالعان جوقپىز» دەپ كەتتى.

ودان كەيىن احات يبرايەۆ دەگەن بىرەۋ حابارلاستى. ودان باسقا ەشكىم حابارلاسقان جوق. مەن كەلىسىمىمدى بەرگەن جوقپىن.

بۇل نە ماسقارا؟ مەنىڭ كوزىم ءتىرى. مەن سونىڭ جالعاسىن تۇسىرە الماي جۇرگەندىكتەن تۇسىرمەي جۇرگەم جوق.

ماعان وسىعان دەيىن دە جۇرتتار حابارلاسىپ، نەگە «ماحاببات بەكەتىنىڭ» جالعاسىن تۇسىرمەيسىز دەپ سۇرادى. تولەگەن اقىننىڭ ولەڭى بار عوي. «اق جاڭبىرلار توزدىرعان تاۋ سياقتى، مەن ولەمىن ءوزىمنىڭ بيىگىمدە» دەيدى. سول سياقتى بۇل شىعارما ءوز بيىگىندە قالۋى كەرەك.

الگى فيلمنىڭ سينوپسيسىن جىبەرگەن. سسەناريىن جازعان ادام قالاي ۇيالمادى؟ ءتىرى ادامنىڭ شىعارماسىن قايتا جازىپ شىعۋعا قالاي قولى باردى؟ نە رەجيسسەرى، نە سسەناريستى، نە پروديۋسەرى حابارلاسقان جوق. حابارلاسسا دا مەن قارسى بولار ەدىم.

ءوزىڭىز ويلاپ قاراڭىزشى، ەگەر رەسەيدە ميحالكوۆتىڭ شىعارماسىن بىرەۋلەر قايتالاپ ءتۇسىرىپ جاتسا، قانداي شۋ بولار ەدى؟»، - دەيدى تەمەنوۆ اعىنان جارىلا.

رەجيسسەر مۇنىڭ ناعىز ۇرلىق، اۆتورلىق قۇقىقتى بۇزۋ ەكەنىن ايتتى. تەمەنوۆتىڭ ايتۋىنشا، ول بايانعا بىردەن قارسىلىعىن ايتىپ، ەكىنشى فيلم تۇسىرۋگە بولمايتىنىن وزىنە ەسكەرتكەن.

 «مەنىڭ 10-نان اسا فيلمىم بار. كەمىندە 5 باستى ءرولدى سومداعان ادام بار. ەرتەڭ سولاردىڭ ءارقايسىسى مەنىڭ فيلمىمدى جالعاسىن ءتۇسىرىپ جاتسا نە بولعانى؟ مەنىڭ تەاتردا 15-20 شاقتى سپەكتاكلىم بار. ەرتەڭ سول سپەكتاكلدەردى باسقا رەجيسسەر كەلىپ، قايتالاپ قويىپ جاتسا شە؟ بۇلاي بولمايدى.

بۇل - ۇرلىق. ينتەللەكتۋالدى ۇرلىق. مەن - اۆتورىمىن. مەنىڭ شىعارماما مەنىڭ رۇقساتىمسىز نەگە تيسەدى؟

وزدەرىنىڭ دە فيلمدەرى بار عوي. كەرەك بولسا، بايان «كوروۆاسىنىڭ» جالعاسىن ءتۇسىرسىن.

بىلتىر تاعى وسى اڭگىمە ءسوز بولدى. سسەنارييىن ءتىپتى كورسەتكەن دە جوق. مەن بىردەن باس تارتتىم. «بولمايدى» دەدىم. سويتسەم، بايان بۇل ىسكە شىنداپ كىرىسكەن سەكىلدى، مەنىڭ رۇقساتىمسىز، ماعان ءبىر اۋىز ايتپاي الگىندەي دۇنيە جاساپ جاتىر ەكەن.

ءيا، «قازاقفيلم» پلەنكانىڭ يەسى شىعار. ءبىراق، مەن فيلمنىڭ رەجيسسەرى عانا ەمەسپىن، مەن سسەناري اۆتورىمىن. مەن پوۆەستتىڭ اۆتورىمىن. مەنەن رۇقسات سۇراعان دا جوق. ماعان ەشكىم كەلىپ، «وسىنداي فيلم ءتۇسىرىپ جاتىر ەدىك. سسەنارييىنە كومەكتەسسەڭىز» دەپ تە ايتقان جوق»، - دەيدى ول.

رەجيسسەر پروديۋسەردىڭ جاڭا فيلمىنە «ماحاببات بەكەتىنىڭ» مۋزىكاسىن العانىنا دا اشۋلاندى.

«ەستۋىمشە، ولار سول مەنىڭ فيلمىمنىڭ مۋزىكاسىن دا الىپتى. سول فيلمنەن كادرلار العان. وعان كىم رۇقسات بەرگەن؟

اۆتور رەتىندە مەن بۇعان كەلىسپەيمىن. ەگەر امەريكادا نەمەسە ەۋروپادا بولساق، بۇل ءۇشىن بايان جاۋاپ بەرەتىن ەدى.

ءبىر دۇنيە انىق. ولار بۇنى ونەر جاسايىن دەپ ءتۇسىرىپ جاتقان جوق. اقشا تابۋ ماقساتىندا جاساپ جاتىر. سوندىقتان، كەرەك بولسا ەۋروپالىق، بۇكىلالەمدىك اۆتورلىق قۇقىق قورعاۋ ۇيىمدارىنا شىعۋعا دايىنمىن»، - دەيدى تالعات تەمەنوۆ.