الماتى زووباعىندا قوقيقاز بالاپان باسىپ شىعاردى
بۇل تۋرالى زووباقتىڭ بۇرىنعى ديرەكتورى، ءماسليحات دەپۋتاتى ەرجان ەركىنبايەۆ Instagram جەلىسىندە حابارلادى.
«بىزدە تۇڭعىش رەت قوقيقاز بالاپان باسىپ شىعاردى»، دەدى ەرجان ەركىنبايەۆ.
زووباقتىڭ ديرەكتورى ايگۇل تۋلەيەۆانىڭ ايتۋىنشا، قوقيقازدار 2010 -جىلى كولۋمبيادان اكەلىنگەن.
«باقىتتى ءساتتى ءتۇسىرىپ الدىم. جاڭا ءومىر ەسىگىن اشتى. 2010 -جىلى كولۋمبيادان ۇشىپ كەلگەن قوقيقازدار توبى 8 جىلدا ءبىرىنشى رەت ۇرپاق ءوربىتتى»، - دەدى ايگۇل تۋلەيەۆا.
ايتا كەتۋ كەرەك، الماتى زووباعى باسشىلىعى وسىدان 2-3 جىل بۇرىن قوقيقازداردىڭ بالاپان باسپاي جاتقانىن حابارلاعان بولاتىن. باسشىلىق قاماۋداعى قۇستاردىڭ بويىنداعى كۇيزەلىستى الۋ ءۇشىن قوقيقازداردىڭ قورشاۋىنا اينا ورناتقان بولاتىن. بۇل قۇستاردى ۆيزۋالدى تۇردە كوپ سەكىلدى سەزىم قالىپتاستىرۋ ءۇشىن ادەيى ويلاستىرىلعان.
سونىمەن قاتار، الماتى زووباعى جاقىندا قۇستاردىڭ بالاپان باسۋىنا ارنالعان 8 ينكۋباتور ساتىپ العان ەدى.
فوتو: ميحايل سوروكوۋموۆ
اۆتور: گۇلميرا عوسمانالي
