دەنيستىڭ اناسى جۋرناليستەردەن تەن اۋلەتىنىڭ قازىرگى جاعدايىنا تۇسىنىستىكپەن قاراۋىن ءوتىندى

استانا. قازاقپارات - دەنيس تەننىڭ تۋىستارىنىڭ اتىنان بارلىق قازاقستان حالقى مەن حالىقارالىق قاۋىمداستىققا قيىن ساتتە ءبىزدىڭ قايعىمىزبەن ءبولىسىپ، وتباسىمىزدى قولداعانى ءۇشىن ريزامىز.

 اسىرەسە نۇرسۇلتان ءابىش ۇلى نازاربايەۆقا العىسىمىز شەكسىز. پرەزيدەنت ءارقاشان دەنيستى قولداپ، كومەك كورسەتتى. سونىمەن بىرگە مەملەكەتتىك ورگاندار مەن اكىمدىكتىڭ قولداۋىن سەزىندىك.

دەنيس تەننىڭ اناسى وكسانا تەن وسىلاي دەپ جۇرتشىلىققا مالىمدەمە جاساپ، ريزاشىلىعىن ءبىلدىردى. ونىڭ ايتۋىنشا، قايعىلى وقيعا بولعان ساتتەن باستاپ وتاندىق جانە شەتەلدىك اقپارات قۇرالدارىنىڭ وكىلدەرى كوپتەپ حابارلاسقان.

 «الايدا دەنيستىڭ قازاسى ەسەڭگىرەتىپ، وي جيناقتاۋعا ءالى دە مۇمكىندىك بەرەر ەمەس. سوندىقتان ءبارىمىز ءۇشىن ورتاق قايعىعا تۇسىنىستىكپەن قاراپ، ۇلىمىزدىڭ اسقاق اتىن ۇلىقتاپ، ول تۋرالى شىنايى ەستەلىكتى ساقتاۋعا تىرىسايىق»، -  دەدى وكسانا تەن.

 ايتا كەتەيىك، قازاق ەلىنىڭ داڭقىن اسپانداتىپ، جاي وعىنداي جارق ەتىپ، ومىردەن وزعان دەنيس تەننىڭ قازاسىنا قايعىرماعان جان جوق. دەنيس تەن مانەرلەپ سىرعاناۋدان سوچي وليمپياداسىندا قولا جۇلدەگەر اتانىپ، الەمنىڭ ايتۋلى سپورتشىلارى قاتارىنان ويىپ تۇرىپ ورىن العان سايىپقىران ەدى. ەل سپورتىندا عانا ەمەس، حالىقارالىق دەڭگەيدە جارق ەتكەن جارىق جۇلدىز ارتىندا ۇلكەن جەڭىستى جول قالدىردى. ونىڭ اسقاق رۋحى، ادامي بەينەسى حالىقتىڭ جادىندا ماڭگى ساقتالا بەرمەك.

www.24.kz