بيشىمبايەۆ پەن ەرمەگيايەۆتىڭ جازاسى جەڭىلدەي مە

استانا. قازاقپارات - قازاقستاندا جۇزدەگەن قىلمىستار بويىنشا جازا جەڭىلدەيدى.

اتالعان نورماتيۆتىك- قۇقىقتىق وزگەرىستەر وسى ايدىڭ اياعىندا كۇشىنە ەنەدى، دەپ حابارلايدى قازاقپارات ءتىلشىسى.

باس پروكۋروردىڭ ورىنباسارى مارات احمەتجانوۆتىڭ ايتۋىنشا، ەكونوميكالىق قىلمىستار بويىنشا ءىرى جانە اسا ءىرى كولەمدەگى شىعىننىڭ مولشەرى ەكى ەسەگە ارتادى. وسىعان بايلانىستى 2,5 مىڭ سوتتالعان ادامنىڭ جازاسى قىسقارادى.

ولار مۇلىكتى تالان-تاراجعا سالۋ مەن الاياقتىق ءۇشىن تۇرمەگە قامالعان بولاتىن. الايدا اسا اۋىر قىلمىستى ۇيىمداسقان توپتىڭ قۇرامىندا جاساعانداردىڭ جازاسى سول كۇيىندە قالادى.

«ماسەلەن، بيشىمبايەۆ پەن ەرمەگيايەۆكە قاتىستى «ۇيىمداسقان قىلمىستىق توپتىڭ قۇرامىندا زاڭسىز ارەكەتتەردى جاسادى» دەگەن زاڭدى ۇكىم بولسا، ولاردىڭ جازاسى قايتا قارالمايدى. نەگىزى، امنيستياعا دا، شارتتى تۇردە بوساتۋعا دا جاتپايىن ساناتتار بولادى. بۇرىن قىلمىستىق توپتىڭ قۇرامىندا بولعان ادام ءبارىن مويىنداپ، ءوز سىبايلاستارىن كورسەتسە، وعان قاتىستى پروتسەسسۋالدى كەلىسىم قولدانىلاتىن. ءسويتىپ، ونى بوساتىپ جىبەرەتىن ەدى. ەندى، ونداي بولمايدى. ول ادام قىلمىستىق توپتىڭ قۇرامىندا زاڭسىز ارەكەت جاساسا، بارىمەن بىرگە اياعىنا دەيىن سوتتالاتىن بولادى»، - دەدى م. احمەتجانوۆ استانادا وتكەن باسپا ءسوز ءماسليحاتىندا.

ايتا كەتەيىك، قىلمىستىق ساياساتتى ىزگىلەندىرۋ اياسىندا قىلمىستىق كودەكسكە 262 وزگەرىس، قىلمىستىق- پروتسەسسۋالدىق كودەكستىڭ - 45، سونداي-اق، قىلمىستىق- اتقارۋ كودەكسىنە 9 وزگەرىس ەنگىزىلدى.

اتاپ ايتقاندا، ادام ولىمىنە قاتىسى جوق 247 قىلمىس بويىنشا العاش رەت قوعامدىق جۇمىستار بالامالى جازا رەتىندە قولدانىلاتىن بولادى. بۇدان بولەك، ايىپپۇلدىڭ ەڭ تومەنگى مولشەرى 500 اەك- تەن 200 ا ە ك- كە دەيىن (1,2 ميلليون تەڭگەدەن 481 مىڭ تەڭگەگە) ازايتىلادى. ەندى، ونى ءۇش ايدا ەمەس، التى ايدا تولەۋگە بولادى.

«وسىنىڭ ارقاسىندا مىڭداعان ادام سوتقا جۇگىنىپ، ايىپپۇلدىڭ مولشەرىن ازايتىپ قانا قويماي، ونى تولەۋ مەرزىمىن ۇزارتا الادى»، - دەدى م. احمەتجانوۆ.

ال ەكونوميكالىق قىلمىستىق بويىنشا ءىرى جانە اسا ءىرى كولەمدەگى شىعىننىڭ مولشەرى ەكى ەسەگە ارتادى. وسىعان بايلانىستى 2,5 مىڭ سوتتالعان ادامنىڭ جازاسى قىسقارادى. ولار مۇلىكتى تالان-تاراجعا سالۋ مەن الاياقتىق ءۇشىن تۇرمەگە قامالعان بولاتىن.

بۇدان بولەك، 12 اۋىر قىلمىس بويىنشا سۋديالار باس بوستاندىعىن شەكتەۋ جازاسىن قولدانا الادى.

اتالعان قىلمىستارعا اسكەري، ەكونوميكالىق، لاۋازىمدىق جانە مۇلىككە قاتىستى زاڭ بۇزۋشىلىقتار كىرەدى. ەسەسىنە ايىپپۇلداردىڭ كولەمى ارتادى. ال 2 جىلعا دەيىن جانە العاش رەت سوتتالعاندار قاۋىپسىزدىك دەڭگەيى تومەن مەكەمەلەرگە اۋىستىرىلادى.

«جالپى، گۋمانيزاتسيا شارالارىمەن 5 مىڭ ادام قامتىلادى. ءبىراق ولاردى ءبىر ۋاقىتتا بوساتپايدى. سوتتار وتىنىمدەردى قاراۋى قاجەت. ءوز شەشىمىن شىعارۋى ءتيىس. ايىپپۇل سالا ما، باسقا مەكەمەگە اۋىستىرا ما، وسىنىڭ بارىنە ءبىراز ۋاقىت كەتەدى. وسى ورايدا ماڭىزدى ءبىر ماسەلەنى اتاپ وتكەن ءجون، ادام ولتىرگەن، زورلىق جاساعان، ەكسترەميزم مەن تەرروريزمگە بارعان، قاراقشىلىق پەن ۇرلاق جاساعان ادامداردى ەشكىم بوساتپايدى»، - دەيدى م. احمەتجانوۆ.