دەنيس تەننىڭ ولىمىنە قاتىستى ءۇشىنشى ادام ۇستالدى

استانا. قازاقپارات - بۇعان دەيىن ەكى قىلمىسكەر ۇستالعان بولاتىن، دەپ حابارلايدى قازاقپارات ءتىلشىسى.

باس پروكۋروردىڭ ورىنباسارى مارات احمەتجانوۆتىڭ ايتۋىنشا، ءۇشىنشى ادام ءتيىستى اقپاراتتى ۋاقىتىندا جەتكىزبەگەنى ءۇشىن جاۋاپقا تارتىلىپ وتىر.

«ءيا، دەنيس تەننىڭ ءولىمى بويىنشا ءۇش ادام ۇستالدى. ءۇشىنشى ادامنىڭ اتى-ءجونىن ايتپاي-اق قويايىن. ول ءتيىستى اقپاراتتى ۋاقىتىندا ايتپاعانى ءۇشىن جاۋاپقا تارتىلىپ وتىر»، - دەدى م. احمەتجانوۆ استانادا وتكەن باسپا ءسوز ءماسليحاتىندا.

ايتا كەتسەك، قازاقستاندىق مانەرلەپ سىرعاناۋشى دەنيس تەن 19 -شىلدە كۇنى پىشاق جاراقاتىنان قازا بولعان ەدى. وقيعا قۇرمانعازى بايسەيىتوۆا كوشەلەرىنىڭ قيىلىسىندا 19 -شىلدەدە تۇسكى ساعات 15:00 شاماسىندا بولعان. سپورتشى كولىگىنىڭ ايناسىن ۇرلاماق بولعان ەكى ادامنىڭ ۇستىنەن تۇسكەن. ارادا باستالعان جانجالدىڭ سالدارىنان ۇرىلار دەنيس تەنگە پىشاق سۇعىپ العان. ول وڭ جاق سانىنىڭ جوعارعى تۇسىنا جاراقات الدى. 25 جاستاعى تەن ءۇش ليتر قان جوعالتىپ، اۋرۋحاناعا وتە اۋىر جاعدايدا جەتكىزىلدى. ءبىراق الماتى قالالىق دەنساۋلىق ساقتاۋ باسقارماسىنىڭ باسشىسى سەرىكبول مۋسينوۆ قوسىمشا قان قاجەت ەمەستىگىن جانە رەسۋرستار جەتكىلىكتى ەكەندىگىن ءمالىم ەتكەن بولاتىن.

2,5 ساعاتقا جالعاسقان رەانيماتسيالىق شارالارعا قاراماستان، اۋرۋحانا دارىگەرلەرى ونىڭ ومىرىنە اراشا تۇسە المادى. ساعات 17.30-دا وليمپيادا جۇلدەگەرى قايتىس بولدى.

ادام ءولتىرۋ بابىمەن قىلمىستىق ءىس قوزعالدى.

كەيىن بەلگىلى بولعانداي، سپورتشىنىڭ ولىمىنە قاتىسى بار ەكى كۇدىكتىنىڭ ءبىرى ۇستالىپ، ول قىلمىسىن مويىندادى. ەكىنشى كۇدىكتى - 1994 -جىلى تۋعان قىزىلوردا وبلىسى، قارماقشى اۋدانى، اقاي اۋىلىنىڭ تۋماسى ارمان قۇدايبەرگەنوۆكە ىزدەۋ جاريالاندى.

سونداي-اق، دەنيس تەننىڭ ولىمىنە كۇدىكتى نۇرالى قياسوۆ كۇزەتپەن المالى اۋداندىق سوتىنا جەتكىزىلگەن.

ال دەنيس تەننىڭ ءولىمى بويىنشا كۇدىكتى ەكىنشى ادام ارمان قۇدايبەرگەنوۆ ۇستالعان بولاتىن.