بالعىنبەك يماشەۆ: قازاقستاننىڭ نامىسىن قورعايمىن دەپ جۇرگەن ادامدى قالاي جاقسى كورمەيسىڭ؟
بۇگىن مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى قازاقستاننىڭ جازۋشىلار وداعىمەن بىرلەسىپ «رۋحاني جاڭعىرۋ» باعدارلاماسى اياسىندا استانانىڭ مەملەكەتتىك قىزمەتكەرلەرى ءۇشىن شىعارماشىلىق كەش ۇيىمداستىردى. جينالعاندار كەش قوناعى بولعان بەلگىلى ايتىسكەر اقىن بالعىنبەك يماشەۆكە كوكەيدە جۇرگەن سۇراقتارىن قويىپ، تۇشىمدى جاۋاپ الدى.
كەش بارىسىندا جينالعانداردىڭ ءبىرى «كەشەگى دەنيس تەننىڭ ءولىمى قازاق حالقىنا عانا ەمەس، بۇكىل الەم حالقىنا اۋىر ءتيدى. ارتىق ايتقاندىق ەمەس. سوندا وسى «رۋحاني جاڭعىرۋىمىز» قايدا قالدى؟ ءاربىر وتباسى بالاسىن ۇرلىقشى بولسىن، بىرەۋدى توناسىن، زورلاسىن دەپ تاربيەلەپ ءوسىردى مە؟ ادام رۋحاني ازعىنداعان كەزدە، وسىنداي قادامدارعا بارادى. مەنىڭ تۇسىنبەي قويعانىم، «رۋحاني جاڭعىرۋ» كىمدەرگە قاجەت؟ نەگە ءبىزدىڭ قوعامىمىزدا جاعىمسىز جاڭالىقتار كوبەيىپ كەتتى؟» دەپ سۇرادى.
«ماسەلە دەنيس تەندە ەمەس، ول كارىس پە، قازاق پا، ورىس پا. ونى قازاق ولتىرگەنى ءۇشىن نامىستاناتىن نارسە ەمەس. وكىنىشكە قاراي، مۇنداي وقيعا، ۇرلىق-قارلىق كۇن سايىن بولىپ جاتىر. 15 وداقتاس رەسپۋبليكانىڭ ىشىندە ءۇش ميلليونەر قالاسى بار قازاقستان عانا. ەندى رەسەي مەن ۋكراينانى قوسپاعاندا. ءبىزدىڭ ەلىمىزدە الماتى، استانا، شىمكەنت ميلليوندىق قالا بولدى. بۇرىن ۋكراينادا حالقى ميلليوننان اساتىن بەس قالا بولاتىن. قازىر ەكى قالاسىنىڭ حالقى توعىز ءجۇز مىڭعا ءتۇسىپ قالدى. ءبىز ميلليونەر قالالاردىڭ سانى جاعىنان ۋكراينامەن تەڭ بولىپ تۇرمىز. قالعان 15 وداقتاس ەلدىڭ ەشقايسىسىندا ميلليونەر قالا جوق. سونداي دامىعان الماتى سياقتى قالادا تاپا-تال تۇستە چەمپيوننىڭ ايناسىن ۇرلاۋ، ونى كورىپ قالعانى ءۇشىن ءولتىرىپ كەتۋ - وتە ۇلكەن نۇقسان ارينە. جالىنداپ تۇرعان جاپ-جاس بالا، ءارى قانداي ادەمى، سىپايى، ءوزىن قازاقپىن دەپ جۇرگەن، امەريكانىڭ كەرەگى جوق، قازاقستاننىڭ نامىسىن قورعايمىن دەپ جۇرگەن ادامدى قالاي جاقسى كورمەيسىڭ؟! ءبارىمىز جاقسى كورەمىز عوي. ءبىراق ماسەلە مىنادا عوي، بۇل كۇندە بولىپ جاتقان وقيعا«، - دەدى ايتىسكەر اقىن.
يماشەۆ ورەلى ۇرپاق تاربيەلەۋ ءۇشىن، اتا-انا، ەڭ الدىمەن ءوزىن تاربيەلەپ ۇيرەنۋى كەرەك دەيدى.
«مىناداي ءتامسىل بار عوي: بالاڭدى تاربيەلەپ اۋرە بولما، ەڭ الدىمەن، ءوزىڭدى تاربيەلە دەگەن. ءبىز جارالعالى اللا تاعالانىڭ بىزگە قويعان ماقساتى، ءدىننىڭ بەكىتىپ بەرگەن شارتتارى، ماقساتى ءبىر-اق نارسە - ادامنىڭ ءوزىن-ءوزى تاربيەلەۋى. سوندىقتان ءبىز بىرەۋدى تاربيەلەۋمەن اينالىسپاۋىمىز كەرەك. ءارقايسىمىمىز ءوزىمىزدى تاربيەلەسەك، قىزىمىز دا، ۇلىمىز دا بىزگە قاراپ وسەدى. قازاقتا «اكە كورگەن وق جانار، شەشە كورگەن تون پىشەر»، «اناعا قاراپ قىز وسەر، اكەگە قاراپ ۇل وسەر» دەگەن ماقال بار عوي. قازاق وسى ماقالمەن- اق كىمنىڭ كىمگە قاراپ ۇلگى الۋى كەرەك ەكەنىن ايتىپ قويدى. ءبىراق قازىر بىزدە اكەسى جوق ورتا، اجىراسقان وتباسىلار كوبەيىپ كەتتى. ولاردىڭ بالالارى قاي اكەگە قاراپ بوي تۇزەيدى؟ قوعامىمىزدا مۇنداي ماسەلەلەر كوپ. ءبىز باياعى داستۇرىمىزگە، سالتىمىزعا ورالمايىنشا، ەكونوميكالىق جاعىنان قانشا دامىساق تا، رۋحاني الەمنىڭ الدىنا شىعا المايمىز»، - دەدى اقىن.
