سوت اتىشۋلى قايرات جاماليەۆتى نەلىكتەن بوستاندىققا شىعارعانىن ءتۇسىندىرىپ بەردى
سوتتىڭ باسپا ءسوز قىزمەتى اتىشۋلى كاسىپكەردىڭ جازاسى نەلىكتەن جەڭىلدەتىلگەنىن ءتۇسىندىرىپ بەردى. بۇل تۋرالى Sputnik قازاقستان حابارلايدى.
سوت اتىشۋلى كاسىپكەر قايرات جاماليەۆتىڭ جازاسىن جەڭىلدەتىپ، وعان 800 مىڭ تەڭگە كولەمىندە ايىپپۇلدى تولەۋگە مىندەتتەگەن بولاتىن.
«الەۋمەتتىك جەلىلەرىنىڭ پايدالانۋشىلارى مەن ب ا ق وكىلدەرى كوكشەتاۋلىق قالالىق سوتتىڭ شەشىمىنە قاتىستى ءارتۇرلى پىكىر ءبىلدىردى. وسىعان بايلانىستى وسەك-اياڭداردى توقتاتۋ ءۇشىن قابىلدانعان شەشىمدى تولىعىراق ءتۇسىندىرىپ وتكىم كەلەدى»، - دەپ جازدى كۇلاش دومالاقوۆا ءوزىنىڭ Facebook جەلىسىندەگى پاراقشاسىندا. ول وبلىستىق سوتتىڭ باسپا سوزىندە جۇمىس ىستەيدى.
كۇلاش دومالاقوۆا كاسساتسيالىق سوتتىڭ 2017-جىلى مامىر ايىندا وتكەنىن ايتتى. سول كەزدە سوت قايرات جاماليەۆتىڭ جازاسىن 13 جىلدان 7 جىلعا دەيىن جەڭىلدەتكەن ەدى.
سونىمەن قاتار، كۇلاش دومالاقوۆا كاسىپكەر جازاسىنىڭ وتەلمەگەن بولىگىن ايىپپۇلعا اۋىستىرۋ تۋرالى ءوتىنىشتىڭ كوكشەتاۋداعى قالالىق سوتتا قارالعانىن ءتۇسىندىردى. كاسىپكەر 2018-جىلدىڭ قاڭتار ايىنان باستاپ جازاسىن كوكشەتاۋ ە ت س-166/24 مەكەمەسىندە وتەپ جاتقان.
«ول قىلمىستىق اتقارۋ جۇيەسىنىڭ مەكەمەسىندە ءوزىنىڭ جاقسى قىرلارىن كورسەتتى. مەكەمە وتكىزگەن مادەني شارالارعا بەلسەندى قاتىستى. جازاعا كەسىلگەن ادامداردىڭ ءوزىن-ءوزى تاربيەلەۋگە بايلانىستى اشىلعان ۇيىمىنا مۇشە بولعان»، - دەدى كۇلاش دومالاقوۆا.
ەستەرىڭىزگە سالا كەتەيىك، 2013-جىلى قايرات جاماليەۆ ءالىبي جۇماعۇلوۆدى سوققىنىڭ استىنا العانى ءۇشىن 13 جىلعا سوتتالعان بولاتىن.
