استانادا جاڭا فورماتتاعى ەرەكشە بازار سالىنادى

استانا. قازاقپارات - استانادا ماسكەۋلىك دانيلوۆ بازارىنىڭ پرينسيپىمەن جۇمىس ىستەيتىن گاسترونوميالىق بازاردىڭ قۇرىلىسى باستالدى، دەپ حابارلايدى قازاقپارات ەلوردا ينفوعا سىلتەمە جاساپ.

 بازاردىڭ باستى ەرەكشەلىگى - ساتىپ العان ازىق- تۇلىكتەن بازاردىڭ باسىندا كەز كەلگەن تاعامدى دايىنداتىپ جەۋگە بولادى.

ماسكەۋدەگى دانيلوۆ بازارى قالا تۇرعىندارىمەن بىرگە تۋريستەردىڭ سۇيىكتى جەرلەرىنىڭ ءبىرى. سەبەبى، وندا ازىق- تۇلىكتى ساتىپ الىپ، بازار اۋماعىنداعى ءدامحانالاردا دايىنداتىپ تاماق ىشۋگە بولادى. بازاردا ءتۇرلى جارمەڭكەلەر، گاسترونوميالىق فەستيۆالدەر مەن بەلگىلى باس اسپازداردىڭ شەبەرلىك ساباقتارى ءجيى وتكىزىلەدى.

«ول ادامدار تەك جاڭا پىسكەن ءارى ساپالى ازىق- تۇلىك الۋ ءۇشىن عانا ەمەس، ۋاقىتتى كوڭىلدى وتكىزۋ ءۇشىن باراتىن جەر. دانيلوۆ بازارى تەك ساۋدا- ساتتىق جاسايتىن جەر عانا ەمەس، دوس- جاراندارمەن كەزدەسىپ، ءدامدى تاعام جەپ دەمالاتىن ورىن. ياعني، ول تۇتىنۋشىنىڭ مەنتاليتەتىن تۇتاس وزگەرتەدى»، - دەدى استانا قالاسىنىڭ ينۆەستيتسيالار جانە كاسىپكەرلىكتى دامىتۋ باسقارماسى باسشىسىنىڭ ورىنباسارى رىسگۇل قاۋعابايەۆا.

ايتا كەتەيىك، بۇگىنگى كۇنى ماسكەۋدەگى دانيلوۆ بازارىندا 30-دان استام مەيرامحانا مەن ءدامحانا بار. وندا ازىق- تۇلىك ساتىپ الۋمەن بىرگە ءتۇرلى ۇلتتاردىڭ اسحاناسىنان ءدام تاتۋعا بولادى.

 استانادا اشىلاتىن جاڭا گاسترونوميالىق بازاردا دا ءتۇرلى ونىمدەر مەن تاعامدار بولادى دەپ جوسپارلانىپ وتىر. سەبەبى، جاڭا گاسترونوميالىق بازار ۇزدىك فەرمەرلىك ونىمدەرمەن بىرگە الەمنىڭ تۇكپىر- تۇكپىرىنەن ءتۇرلى دەليكاتەستەردى ۇسىناتىن بولادى.

ساۋدا ورتالىعىندا ازىق- تۇلىكتى ساقتاۋعا قاجەتتى توڭازىتقىشتار، قويما. تاۋار تۇسىرەتىن ورىندار مەن ونىمدەردى ءبولىپ، تۇزداۋ ورىندارى بولادى. ساتۋشىلار زاماناۋي ساۋدا سورەلەرىمەن قامتىلادى.

جاڭا گاسترونوميالىق بازار سارى ارقا اۋدانىندا ش. ايتماتوۆ كوشەسى مەن 189 كوشەنىڭ قيىلىسىندا بولادى. بازار 2019 -جىلى اشىلادى دەپ كوزدەلىپ وتىر.