جاقسىلىق ۇشكەمپىروۆ تۋرالى كوركەم فيلمنىڭ ءتۇسىرىلىمى باستالعالى جاتىر

الماتى. قازاقپارات - ش. ايمانوۆ اتىنداعى «قازاق فيلم» كينوستۋدياسىندا «جەڭىمپاز» اتتى (جۇمىس اتاۋى) كينوجوبانىڭ قورعالىمى ءوتتى. وندا فيلمنىڭ شىعارماشىلىق توبى اتقارعان جۇمىستارى تۋرالى جانە تۇسىرىلىمگە دايىن ەكەندىكتەرىن جەتكىزدى، دەپ حابارلايدى قازاقپارات.

اتالعان سپورتتىق دراما قازاقستاننىڭ ەڭبەك ەرى، گرەك- ريم كۇرەسىنىڭ پالۋانى، الەم چەمپيونى، وليمپيادا چەمپيونى، ك س ر و ەڭبەك سىڭىرگەن سپورت شەبەرى (1980)، قازاق ك س ر ەڭبەك سىڭىرگەن جاتتىقتىرۋشىسى - جاقسىلىق ۇشكەمپىروۆتىڭ ءومىرى تۋرالى باياندايدى.

 - بۇل كوركەم فيلم جانرىندا تۇسىرگەلى وتىرعان مەنىڭ العاشقى تۋىندىم. كارتينا 48 ك گ سالماقتاعى وليمپيادا چەمپيونى بولعان العاشقى قازاق - جاقسىلىق ۇشكەمپىروۆ تۋرالى. ول ءتۇرلى مەملەكەت دارەجەسىندەگى جارىستارعا قاتىسىپ، جۇلدەلى ورىنداردان كورىنسە دە، سپورتشىعا حالىقارالىق ارەنالارعا شىعۋعا مۇمكىندىك بەرمەگەن. تەك 1980 -جىلى عانا ول ماسكەۋدە وتكەن وليمپيادا ويىندارىنا قاتىسۋعا جولداما الىپ، الەمدىك دەڭگەيدە ونەرىن كورسەتە الدى. فيلم وڭتۇستىك قازاقستان اۋىلدارىنىڭ بىرىندە دۇنيەگە كەلگەن سپورتشىنىڭ بالالىق شاعىنان باستاپ، بۇكىل كەڭەس وداعى قوشەمەتپەن قارسى العان پالۋاننىڭ وليمپيادا ويىندارىندا جەتكەن جەتىستىكتەرىنە دەيىنگى ءومىر جولىن بەينەلەيدى، - دەدى فيلمنىڭ رەجيسسەرى باقىت قايىربەكوۆ.

 قاتارىندا كينورەجيسسەر ساتىبالدى نارىمبەتوۆ، كينودراماتۋرگ سماعۇل ەلۋباي بار «قازاقفيلمنىڭ» ەكسپەرتتىك كەڭەس مۇشەلەرى الدىندا ءتۇسىرىلىم توبى كورمە ۇيىمداستىرعان. وندا فيلمدە قولدانىلاتىن رەكۆيزيتتەر مەن كەڭەس وداعى داۋىرىندەگى سپورتتىق كوستيۋمدەر قويىلعان. ەكسپەرتتىك كەڭەس الدىندا ءسوز العان فيلمنىڭ باس پروديۋسەرى تاسبولات مەرەكەنوۆ تۇسىرىلىمدەر وسكەمەن، تالدىقورعان، الماتى جانە الماتى وبلىسىندا جۇرەتىندىگىن ايتتى. سونىمەن قاتار، كەي ساحنالار بەلارۋستا وتەتىنىن دە حابارلادى. ايتا كەتەلىك، فيلمنىڭ ءتۇسىرىلىم جۇمىستارى شىلدەنىڭ 29 باستالىپ، قىركۇيەكتىڭ سوڭىنا دەيىن جالعاسادى.

 - جاقىندا عانا قىتايدا وتكەن ش ى ۇ اياسىنداعى كينوفەستيۆالدە «قازاقفيلم» مەن «بەلارۋسفيلم» ىنتىماقتاستىق تۋرالى مەموراندۋمعا قول قويعان بولاتىن. وسى ءىس- شارادان سوڭ، مينسكىگە ءتۇسىرىلىم توبىمەن بارىپ، ونداعى سپورت نىساندارىن، 80- جىلداردى ەسكە سالاتىن قاجەتتى رەكۆيزيتتەردى كورىپ قايتتىق. مينسكىدە 80- جىلدارداعى ماسكەۋگە ۇقسايتىن كوشەلەر ساقتالعان ەكەن. وندا زاماناۋي جارناما، دۇكەندەر مەن مەيرامحانالار جوق. مينسكىدەگى تۇسىرىلىمدەر تامىز ايىنا بەلگىلەنگەن، - دەپ قوستى رەجيسسەر.

كاستينگ- ديرەكتور ايجان دۇيسەمبايەۆانىڭ ايتۋىنشا، بيىل ناۋرىز ايىندا جاريالانعان رەسپۋبليكالىق كاستينگكە 1000 استام جاسوسپىرىم مەن جەتكىنشەك قاتىسقان. ۇزاق فوتو جانە ۆيدەو سىناقتان كەيىن باستى رولگە ەلنار نازارقۇل مەن سانۇرجان سۇلەيمەنوۆ بەكىتىلگەن. ولار جاقسىلىق ۇشكەمپىرىوۆتىڭ بالا كەزى مەن جەتكىنشەك شاعىن سومدايدى. ال تەاتر اكتەرى ولجاس ساق جىگىت شاعىن وينايتىن بولسا، قازاقستاننىڭ حالىق ءارتىسى، جەزقازعان تەاترىنىڭ اكتەرى دوسجان جانبوتايەۆ 60 جاستاعى سپورتشىنىڭ وبرازىن جاسايدى.