قازاقستاندا ەلەكتروموبيلدەرگە سۇرانىس بار ما

استانا. قازاقپارات - قازاقستاننىڭ اۆتوكولىك كاسىپورىندارىنىڭ وداعى ەلەكتروموبيلدەر نارىعىن دامىتۋعا قاتىستى ءوز ۇستانىمىن ءبىلدىردى، دەپ حابارلايدى قازاقپارات ءتىلشىسى.

وداق باسشىسى ولەگ الفەروۆتىڭ ايتۋىنشا، ازىرشە وسى ساناتتاعى كولىكتەرگە سۇرانىس تىم از. ماسەلەن، سوڭعى التى ايدىڭ ىشىندە قازاقستاندا تەك 34 ەلەكتروموبيل عانا ساتىلدى. ونداي كولىكتەردىڭ از مولشەردە ساتىلىپ جاتقانىنا بىرنەشە سەبەپ بار.

نەگىزگى ماسەلە - قۋات كوزدەرى. ال ارزان قۋات كوزدەرىن ءالى ويلاپ تاپپاعان. اككۋمۋلياتور باتتارەيالارى دا ارزان ەمەس. وعان قوسا، ەلەكتروموبيلدەرگە ارنالعان باتارەيالار ءوز جەرىمىزدە جاسالمايدى. سول سەبەپتى وسى ساناتتاعى كولىكتەر قىمبات.

«قازاقستان ءۇشىن گيبريدتى كولىكتەردى شىعارعان ءتيىمدى. ماسەلەن، «بەنزين+ەلەكتر قۋاتى» جانە «بەنزين+گاز». قازاقستاندا گاز كوپ. سوندىقتان گازبەن جۇرەتىن كولىكتەردى ارتتىرۋعا ابدەن بولادى. وعان قوسا، وتاندىق كاسىپورىندار ءبىر ۋاقىتتا بەنزينمەن دە، گازبەن دە جۇرەتىن مودەلدەردى ۇسىنا الادى. ونداي كولىكتەرمەن جۇرگەن ارزان ءارى ءتيىمدى»، - دەدى و. الفەروۆ استانادا وتكەن باسپا ءسوز ءماسليحاتىندا.

ايتا كەتەيىك، وداق باسشىسى مەملەكەتتىك ورگانداردىڭ شەتەلدىك كولىكتەردى ساتىپ الۋعا قاتىستى ناقتى ستاتيستيكانى جاريالادى.

وعان سايكەس، وتكەن جىلى ءبىرىنشى جارتىجىلدىقتا 375 شەتەلدىك كولىك ساتىپ الىنعان بولاتىن. سونىڭ بارىنە 4 ميلليارد تەڭگە جۇمسالدى. بيىل التى ايدا مەملەكەتتىك ورگاندارعا تەك 92 كولىك قانا شەتەلدەن جەتكىزىلدى. وعان 677 ميلليون تەڭگە كەتتى. بۇدان بولەك، ول جىل باسىنان بەرى ساتىپ الىنعان ەڭ قىمبات قىزمەتتىك كولىكتىڭ باعاسىن جاريالادى.