ارىستانباب كەسەنەسىندە قايتا جاڭعىرتۋ جۇمىستارى جۇرگىزىلدى

تۇركىستان. قازاقپارات - تۇركىستان وبلىسىنداعى ارىستانباب كەسەنەسىندە قايتا جاڭعىرتۋ جۇمىستارى جۇرگىزىلدى. «رۋحاني جاڭعىرۋ» باعدارلاماسى اياسىندا كەسەنەنىڭ اينالاسى اباتتاندىرىلىپ، زيارات ەتۋشىلەرگە قولايلى جاعداي جاسالدى، دەپ حابارلايدى قازاقپارات.

 وتىرار مەملەكەتتىك ارحەولوگيالىق قورىق- مۋزەيىنىڭ مالىمەتىنشە، كەسەنەنى قالپىنا كەلتىرۋ جۇمىستارى قر مادەنيەت جانە سپورت مينيسترلىگىنىڭ باستاماسىمەن جۇزەگە اسىرىلۋدا. «قاز قايتا جاڭعىرتۋ» مەكەمەسى تاريحي- مادەني ورىندى قايتا جاڭعىرتىپ، ءبىرقاتار جوندەۋ جۇمىستارىن اتقاردى.

 ايتا كەتەيىك، وتكەن جىلى دا اتالعان مەكەمە ارىستانباب كەسەنەسىنە تولىق قالپىنا كەلتىرۋ جۇمىستارىن جۇرگىزگەن بولاتىن. اتاپ ايتار بولساق، كەسەنەنىڭ نامازحانا بولمەسىنىڭ توبە جابىندىسى قايتا ارشىلىپ، قامىس سالىندى. ۇستىنەن تەمىر جابىندىمەن قاپتالىپ، ەدەندەردىڭ استىنا سۋىقتى جانە سۋدى وتكىزبەۋ ءۇشىن گيدرووقشاۋ ورناتىلعان ەدى. سونىمەن قاتار ەسىكتەر اۋىستىرىلىپ، عيماراتتىڭ ىشكى قابىرعالارى ارلەندى.

ەسكە سالايىق، كونە وتىرار جەرىندەگى قوجا احمەت ياساۋيدىڭ ۇستازى ارىستان بابتىڭ كەسەنەسى 12 - عاسىرداعى ساۋلەت ونەرىنىڭ تۋىندىسى. كەسەنە ارىستان باب ومىردەن وزعاننان سوڭ كوپ ۋاقىت وتپەي تۇرعىزىلعان. قۇرىلىسقا كۇيدىرىلگەن قىشتار پايدالانىلعان. ۋاقىت وتە كەلە قۇرىلىس قۇلاپ، جەرمەن- جەكسەن بولعان- دى. كەيىننەن ءامىر تەمىردىڭ ىقپالىمەن XIV- XV  ع ع. ارالىعىندا ارىستان باب قابىرى ۇستىنە قايتا تۇرعىزىلدى. رەسپۋبليكالىق دارەجەدە قورعالاتىن ەسكەرتكىشتىڭ  جاي- كۇيى ءاردايىم باقىلاۋدا ۇستالىپ، قاجەت جاعدايدا كەسەنەگە جوندەۋ، جاڭعىرتۋ جانە اباتتاندىرۋ جۇمىستارى جۇرگىزىلىپ تۇرادى.

اۆتور: اينۇر اقبايەۆا