سەرىك ساپيەۆ: تانىمال سپورتشىلارعا جەكە كۇزەتشى بەرۋ كەرەك

استانا. قازاقپارات - سەرىك ساپيەۆ سپورتشىلارعا كۇزەتشى بەرۋ ماسەلەسىن زاڭ جۇزىندە قولعا الۋ كەرەك دەگەن ۇسىنىس ايتتى.

ق ر ءماجىلىس دەپۋتاتى، وليمپيادا چەمپيونى سەرىك ساپيەۆ سپورتشىلاردىڭ قاۋىپسىزدىگىنە قاتىستى ۇسىنىسىن ايتتى، دەپ حابارلايدى كازتاگ.

«بۇل ماسەلەنى جوعارى دەڭگەيدە قاراستىرۋىمىز كەرەك. قازاقستاننىڭ سپورتشىلارى جەكە كۇزەت قاراۋىندا بولۋى كەرەك. زاڭدا بۇل ماسەلە قاراستىرىلماعان. تەك لاۋازىمدى شەنەۋنىكتەردىڭ، ەلىمىزدىڭ بەتكە ۇستارلارىندا عانا جەكە كۇزەت بار»، - دەيدى سپورتشى.

ساپيەۆ كوپتەگەن تانىمال سپورتشىنىڭ دەنيس تەن سەكىلدى قازا بولعانىن ايتتى.

«ەرتەڭ نە بولارىن بىلمەيمىز. رينگتە دە اجال قۇشۋىمىز مۇمكىن. دەنيس تەن - ءبىز ءۇشىن وتە جاقىن ادام ەدى. ءاردايىم كوڭىلدى جۇرەتىن، تالانتتى ەدى. ونىڭ بار بولمىسىن سۋرەتتەۋگە ءسوز تابا الماي تۇرمىن»، - دەيدى ساپيەۆ.

ايتا كەتەيىك، 19- شىلدە كۇنى الماتىداعى قۇرمانعازى مەن بايسەيىتوۆ كوشەلەرىنىڭ قيىلىسىندا كولىك ايناسىن ۇرلاماق بولعان ەكى ازامات دەنيس تەنگە شابۋىل جاسادى. كيكىلجىڭ ناتيجەسىندە كۇدىكتىلەر سپورتشىنىڭ اياعىنا پىشاق سۇعىپ العان. ناتيجەسىندە دەنيس تەن كوپ قان جوعالتىپ، اۋرۋحانانىڭ جان ساقتاۋ بولىمىندە كوز جۇمدى.

ەسكە سالا كەتەيىك، بۇعان دەيىن ءمينيستردىڭ ورىنباسارى قولعا تۇسكەن ازاماتتاردىڭ شىنايى قىلمىسكەرلەر ەكەنىن مالىمدەگەن ەدى. سونداي-اق، ءى ءى م وكىلى دەنيس تەننىڭ ولىمىنە كۇدىكتىلەردىڭ ءبىرى ارمان قۇدايبەرگەنوۆتىڭ بۇعان دەيىن جاساعان قىلمىسى ءۇشىن نە سەبەپتى تۇتقىندالماعانىن تۇسىندىردى.