جاس وسپىرىمدەر جازعى دەمالىستا قانداي جۇمىس ىستەي الادى؟

استانا. قازاقپارات - قازاقستاندىق وقۋشىلاردىڭ كانيكۋلى جالعاسۋدا جانە جاڭا وقۋ جىلىنا دەيىن ءالى ءبىر جارىم اي بار.

قازاقپارات ءتىلشىسى قاراجات پەن تاجىريبە جيناعىسى كەلەتىن جاس وسپىرىمدەرگە قالعان دەمالىستى ءتيىمدى وتكىزۋ جولدارىن ۇسىنادى.

زاڭ بويىنشا، قازاقستاندا بارلىق بالالارعا جۇمىس ىستەۋگە بولادى، ءبىراق سالا مەن جاسقا بايلانىستى شەكتەۋلەر بار.

14 جاسقا دەيىنگى بالالار كينو، تەاتر، سيرك سالاسىندا جۇمىس ىستەي الادى. ايتسە دە مۇندا بالانىڭ دەنساۋلىعى مەن ادامگەرشىلىك دامۋىنا زالال كەلمەۋى ءتيىس.

ال 14 جاستان باستاپ، مەكتەپ وقۋشىلارى ساباقتان بوس ۋاقىتىندا، دەنساۋلىعىنا زاقىم كەلمەيتىن جاعدايدا جۇمىس ىستەي الادى.

15 جاستان باستاپ، نەگىزگى ورتا جانە جالپى ورتا ءبىلىم العان جاس قازاقستاندىقتاردىڭ جۇمىسقا ورنالاسۋعا قۇقىعى بار. مۇندا ەڭبەك كەلىسىمشارتىنا اتا-انا نەمەسە بالانىڭ قامقورشىسى، اسىراپ الۋشىسى قول قويۋى ءتيىس.

16 جاستاعى جاس وسپىرىمدەر اتا-انا قولىنسىز كەلىسىمشارت بەكىتە الادى. ايتسە دە، بۇل جاستا اۋىر جۇمىسپەن، دەنساۋلىق پەن رۋحاني دامۋىنا قاۋىپتى جانە زيان ورتادا جۇمىس ىستەۋگە تىيىم سالىنعان. سونداي-اق، بۇل جاستا جۇمىس بەرۋشىنىڭ مەنشىگىن كۇزەتەتىن، تولىق ماتەريالدىق جاۋاپكەرشىلىگى بار لاۋازىمداردا جۇمىس ىستەۋگە بولمايدى.

قازاقستان زاڭناماسىنا سايكەس، 18 جاسقا تولماعان بالالاردى قۇمار ويىن بيزنەسىنە، تۇنگى كوڭىل كوتەرۋ ورىندارىنا، ءوندىرىس پەن الكوگول، تەمەكى، ەسىرتكى ونىمدەرىن ساۋدالاۋعا شاقىرۋعا بولمايدى.

كامەلەتتىك جاسقا تولماعان قازاقستاندىقتارعا 4,1 كەلىدەن اۋىر زاتتاردى كوتەرۋ جانە تاسۋ جاعدايىندا جۇمىس ىستەۋگە بولمايدى.

14-16 جاستاعى جاس وسپىرىمدەرگە اپتاسىنا 24 ساعاتتان ارتىق جۇمىس ىستەۋگە بولمايدى.

18 جاسقا تولماعان بالالارعا جوسپاردان تىس قوسىمشا جۇمىستاردى جۇكتەۋگە جانە جىل سايىنعى ەڭبەك دەمالىسىنان شاقىرىپ الۋعا جانە ۆاحتالىق ادىسپەن جىبەرۋگە بولمايدى.

جۇمىستى قايدان ىزدەۋ كەرەك؟

جاس وسپىرىمدەر ءۇشىن جۇمىس ىزدەۋدىڭ قاۋىپسىز جولى - جۇمىسپەن قامتۋ ورتالىعىنا بارۋ. ماسەلەن، استانادا مەكتەپ وقۋشىلارى الماتى اۋداندىق سالىق بولىمشەسىنە جىبەرىلدى، وندا بالالار كۋرەرلىك قىزمەت اتقاردى. وقۋشىلاردىڭ تاعى ءبىر بولىگى «جاسىل ەل» قاتارىن تولىقتىردى. وندا جاس وسپىرىمدەر اعاش پەن گۇل وتىرعىزىپ، سۋارۋمەن اينالىستى. كەيبىرى بوتانيكالىق ساياباقتىڭ اشىلۋىنا ۆولونتەر بولدى.

جاس وسپىرىمدەر ءۇشىن enbek.kz, headhunter.kz رەسۋرستارىنان جۇمىس ىزدەۋ اسا قولايلى ەمەس. ىزدەۋ تاراۋىندا جاس وسپىرىمدەرگە ارنالعان گرافا جوق. دەسە دە، جۇمىس ءوتىلى تالاپ ەتىلمەيتىن، ۋاقىتشا جۇمىس كەستەسى بار بوس ورىندار اراسىندا پروموۋتەر، اكتەر-انيماتور، تاعىلىمدامادان وتۋشىلەردى شاقىرعان حابارلاندىرۋلار بار.

نەگە ءمان بەرۋ كەرەك؟

جۇمىس بەرۋشى كامەلەتتىك جاسقا تولماعان بالامەن ەڭبەك كەلىسىمشارتىن بەكىتۋى ءتيىس. ەگەر جۇمىس بەرۋشى كەلىسىمشارت جاساسپاسا، ايىپپۇل سالىنادى. لاۋازىمدى تۇلعالار ءۇشىن سالىناتىن ايىپپۇل كولەمى - 50 ا ە ك، شاعىن كاسىپكەرلىك پەن كوممەرتسيالىق ەمەس ۇيىم سۋبەكتىلەرى ءۇشىن - 80 ا ە ك، ورتا كاسىپكەرلىك سۋبەكتىلەرى ءۇشىن - 150 ا ە ك، ءىرى كاسىپكەرلىك سۋبەكتىلەرى ءۇشىن - 200 ا ە ك دەيىن بارادى.

سول سەبەپتى، زاڭناما بۇزىلعان جاعدايدا سايكەس شاعىممەن ەڭبەك ينسپەكتسياسى ورگاندارىنا جۇگىنگەن ءجون.