جازدا ءشول قاندىرۋ ءۇشىن

 استانا. قازاقپارات - جاز مەزگىلىنىڭ اپتاپ ىستىعىندا قانشا سۋسىن ىشكەنىڭمەن، ءشولىڭ قانبايتىن كەزدەر بولادى.

كۇن استىندا جۇرگەندە نەمەسە شومىلۋعا بارعاندا، ساياباقتا قىدىرىپ جۇرگەندە سۋدى مولشەردەن ارتىق ىشەمىز. سۋدى قاجەتتىلىگىنە قاراي قانشا كوپ ىشكەنىمەن، ءشولدى قاندىرۋدىڭ ءوز ءتاسىلى بار. ەندەشە تانىس بولا وتىرىڭىزدار.

ءسىز ءىشىپ جۇرگەن سۋدىڭ ساپاسى دەنساۋلىعىڭىزعا تىكەلەي قاتىستى. سەبەبى، سۋدىڭ قۇرامىندا كوپتەگەن ميكروەلەمەنتتەر كەزدەسەدى. ال ونىڭ بىرەۋى جەتىسپەسە نەمەسە مولشەردەن اسىپ كەتسە، وندا ول ءتۇرلى اۋرۋلارعا شالدىقتىرادى.

ماسەلەن، ماگني جەتىسپەسە جۇرەك-قان تامىرلارىنا ارتىق سالماق تۇسەدى، ال كالتسي مولشەرى اسىپ كەتسە، ادامنىڭ ءزار جولدارىندا تاس پايدا بولادى. سونىمەن قاتار ناتري، حلور، سۋلفاتتار مولشەردەن اسقان جاعدايدا قان قىسىمى وزگەرىپ، اسقازان-ىشەك جولدارىنىڭ اۋرۋىنا سەپتىگىن تيگىزەدى جانە سۋدىڭ قۇرامىنداعى سەلەننىڭ جەتىسپەۋشىلىگى قاتەرلى ىسىكتەرگە الىپ كەلەدى.

ال سەلەن ءوز دەڭگەيىنەن اسقان جاعدايدا باۋىرعا زاقىمى ءتيۋى ىقتيمال جانە شاش پەن تىرناقتى سىنعىش ەتەدى. ءبارىڭىز بىلەتىندەي تەمىردىڭ مولشەردەن اسىپ كەتۋى -  اللەرگيالىق سىرقاتتارعا جول باستايدى. جاز ايى سۋدى ادەتتەگىدەن دە كوپ ىشەتىن مەزگىل بولعاندىقتان، سۋ ىشكەندە ءشولدى قاندىرۋدىڭ تومەندەگىدەي تاسىلدەرىن ەستە ۇستاي جۇرىڭىزدەر:

1. سالقىن سۋدى ىشپەڭىز. بىرىنشىدەن - تۇماۋعا سەبەپكەر بولسا، ەكىنشىدەن -  ول اعزاعا باياۋ سىڭەدى. 2. سۋدى اسىقپاي، از- ازدان ءىشىڭىز. قاتتى شولدەگەندە دەم الماستان سۋدى قاعىپ سالاتىنىمىز بار. وسىلايشا توقتاماي كوپ ءىشۋ -  تەردىڭ ءبولىنۋىن كۇشەيتەدى. ال ودان سوڭ تەز شولدەيتىن بولاسىز.

3. كۇنىنە 3 ليتردەن ارتىق سۋ ىشپەڭىز. سەبەبى ادام اعزاسىنداعى سۋ كوپ بولۋى جۇرەك سوعىسىن جيىلەتىپ، قان قىسىمىن كوتەرەدى جانە ەنتىكپە مەن ىسىكتەرگە جول بەرەدى.

4. گازدالعان سۋ ىشپەڭىز. گازسىز سۋ - اعزاداعى جوعالعان سۇيىقتىقتىڭ ورنىن تولتىرادى جانە قۇرامىندا ەشقانداي دا كالوريا بولمايدى.

5. كوك شاي ءىشىڭىز. ول دەنە قىزۋىن رەتتەيدى جانە ىستىق كۇندە ءشولدى جاقسى قاندىرادى. سەبەبى ونىڭ قۇرامىنداعى تانيندەر اعزانى سۋىتىپ، ءشولدى باسادى جانە تەرمەن بىرگە شىققان اعزاداعى ميكروەلەمەنتتەردىڭ ورنىن تولتىرادى. سونىمەن قاتار كۇننىڭ ىستىعىندا امىرلاردى نىعايتادى. الايدا كوك شايدى قاراپايىم سۋدان 3 ەسە از ءىشۋ كەرەك.

6. تابيعي جولمەن اشىتىلعان كۆاس تا ءشولدى قاندىرادى. سونىمەن قاتار استى جاقسى سىڭىرەدى، قۇرامىندا پايدالى امين قىشقىلدارى بار. ونىڭ اشىتقىسىنىڭ قۇرامىندا ءدان، قانت پەن سۋ عانا بولادى. ال قۇرامىندا كونسەرۆانتتار، اروماتيزاتورلار، تاتتىلەندىرگىشتەر، بوياعىشتار، ءسۇت قىشقىلى، ليمون جانە سىركە قىشقىلدارى بار كۆاس سۋسىنىن الماعانىڭىز دۇرىس. ول ديسباكتەريوزعا ۇشىراتۋى مۇمكىن.

7. جاڭا پىسكەن جەمىستەردەن جاسالعان كومپوت ءىشىڭىز. ول ىستىق كۇندە ءشولىڭىزدى باسادى جانە اعزادان جوعالعان سۋ مەن مينەرالدى زاتتاردىڭ ورنىن تولتىرادى. الايدا كومپوتتىڭ قۇرامىندا قانتتىڭ وتە از بولعانى دۇرىس. سەبەبى ءتاتتى كومپوت شولدەتىپ جىبەرەدى.

8. سۋ ساتىپ الاردا جوعارى كاتەگوريالى سۋ الىڭىز. ول سۋسىننىڭ ەتيكەتىندە كورسەتىلەدى. مۇنداي سۋدىڭ قۇرامىندا ادامعا اسا قاجەتتى ميكروەلەمەنتتەردىڭ ءبارى بولادى جانە سانيتارلىق- ەپيدەميولوگيالىق قاعيدالار مەن نورماتيۆتەرگە ساي بولادى.

9. ءسۇت قىشقىلدى تاعامدار تۇتىنىڭىز. قولدان ۇيىتىلعان قۇنارلى ايران كوپكە دەيىن قارىندى دا اشىرمايدى، شولگە دە توتەپ بەرەدى. سەبەبى ونىڭ قۇرامىندا ميكروەلەمەنتتەر، اقۋىزدار مەن دارۋمەندەر كوپ. سونىمەن قاتار ىشەك ميكروفلورالارىنىڭ جاقسارۋىنا اسەر ەتەدى. تەك ايران عانا ەمەس، شۇبات، قىمىزدىڭ دا وراسان زور پايداسى بار. الايدا ءسۇت ولار سەكىلدى سەرگىتىپ، ءشولدى باسپايتىنىن ۇمىتپاڭىز.

10. بال قوسىلعان سۋ ءىشىڭىز. ونى قايناعان سۋعا ەمەس ءۇي جىلىلىعىنداعى سۋدا ەرىتىپ ىشكەنىڭىز ءجون. بال قوسىلعان سۋسىن كوپتەگەن اۋرۋ-سىرقاۋدان ساقتاپ، اعزانى ازىقتاندىرادى جانە ەمدىك قاسيەتتەرى وتە كوپ. سونىمەن قاتار ادامنىڭ ءشولىن باسىپ، قوسىمشا كۇش- قۋات بەرەدى.

Massaget.kz