قازاقستاندىقتار ىستىقكولدە دەمالۋدىڭ ارتىقشىلىعى مەن كەمشىلىگىن ايتتى
كورشىلەس جاتقان قىرعىزستانعا دا دەمالۋعا باراتىن وتانداستاردىڭ سانى ءبىرشاما. NUR. KZ پورتالىنىڭ ءتىلشىسى قازاقستان جۇرتشىلىعىنىڭ قىرعىز ەلىندە قالاي دەمالاتىنىن ءبىلىپ قايتتى.
الەمگە ايگىلى ورتا ازيا جاۋھارى سانالاتىن ىستىقكولدىڭ قىرعىزستاندا ورنالاسقانى بارىمىزگە ايان. ەل ازاماتتارىنىڭ كوبى وسى كولگە كەلىپ، دەمالعاندى ۇناتاتىن كورىنەدى. ءبىرى وسى ايماققا كەلۋلەرىنىڭ سەبەبىن باعانىڭ ارزاندىعىمەن بايلانىستىرسا، ءبىرى كولدىڭ شيپاسىن ايتىپ جاتتى.
ەلمۇرات پەن ايزادا - الماتىداعى جوعارى وقۋ ورىندارىنىڭ بىرىندە وقيتىن ستۋدەنتتەر. بيىل ىستىقكولگە دەمالۋ ءۇشىن ارنايى كەلگەن. ولار قازاقستاندىق وقۋ ورداسىنا تيەسىلى سپورتتىق-ساۋىقتىرۋ لاگەرىنە ورنالاسىپتى.
«كوڭىل-كۇيىمىز كەرەمەت. جاقسى ورنالاستىق. ىستىقكولگە ءبىرىنشى رەت كەلگەسىن، بارلىق تاماشا ورىندارىن كورۋگە اسىعىپ تۇرمىز. تۇزدى كولى ەرەكشە تابيعات ورنى دەيدى وسىنداعىلار. سول سەبەپتى سوعان بارعىمىز كەلىپ تۇر. ءۇش كۇنىمىز ويداعىداي وتەدى دەگەن سەنىمدەمىز»، - دەيدى جاستار.
لاگەردە وقۋ ورنىنىڭ قىزمەتكەرلەرى، ستۋدەنتتەرىنەن بولەك سىرتتان دا ادامدار كەلىپ دەمالادى ەكەن. ادام باسىنا جاعدايى بار بولمەلەر 4500 تەڭگە بولادى. وعان جاتىن ورىن مەن ءۇش مەزگىل تاماق كىرەدى. ال قول جۋعىشى مەن دارەتحاناسى قاباتتا ورنالاسقان بولمەلەر تاۋلىگىنە 3800 تەڭگە بولاتىن كورىنەدى.
«ءبىز ارنايى جالدانعان اۆتوبۋسپەن كەلدىك. الماتىداعى «سايران» ۆوكزالىنداعى اۆتوبۋستاردىڭ بارىپ-قايتۋ قۇنى - 9000 تەڭگە. ال، عالامتور ارقىلى بولەك اۆتوبۋستار ىزدەسەڭىز، 7000 تەڭگەگە دە تابۋعا بولادى»، - دەيدى ەلمۇرات پەن ايزادا.
جاعاجاي لاگەردەن 100 مەتر قاشىقتىقتا ورنالاسقان. بولەك اقىعا مۇندا ارنايى سۋ باناندارى، كاتاماراندار بار.
ىستىقكولگە ارنايى دەمالۋ ءۇشىن قازاقستاندىقتاردىڭ ىشىندە الماتىدان كەلگەن قۋانىش پەن نۇرايىم دا بار. ولار ەكى بالاسىمەن بىرگە «تۇلپار» دەمالىس ورنىندا تۇراقتاعان. بيىل ءۇشىنشى رەت كەلىپتى. بەس كۇن بويى ساۋىعىپ، كۇنگە قىزدىرىنىپ، ەرەكشە دەمالىس وتكىزىپ جاتىر ەكەن.
«ىستىقكولدىڭ سۋى ەرەكشە شيپالى، ساز بالشىعى دا قانشاما دەرتكە داۋا. بيىل ءۇشىنشى رەت كەلىپ وتىرمىز. جاعدايلاردىڭ ءبارى جاسالعان. مۇنداعى قىزمەتكەرلەر ءوز جۇمىستارىن جاقسى بىلەدى، سىپايىلىق تانىتادى. ءبىر اپتالىق دەمالىستى قالتامىز كوتەرگەندىكتەن جىلدا وسىندا كەلىپ تۇرۋعا تىرىسامىز»، - دەدى قۋانىش پەن نۇرايىم.
«قىرعىز ەلىندە دەمالۋ ءتيىمدى مە، الدە قازاقستاندا وسىنداي سوماعا دەمالاتىن ورىندار جوق پا؟» دەگەن ءتىلشىنىڭ سۇراعىنا نۇرايىم بىلايشا جاۋاپ بەردى:
«ءبىز قازاقستاندا دا دەمالامىز. الماتى ماڭىنداعى قاپشاعايدا دا بولعانبىز. تەك قىرعىزستانعا ەمەس، تۇركياعا دا، يتالياعا دا ساپارلاپ بارعانبىز. الەمدى شارلاپ، كورىكتى جەرلەرىندە دەمالعاننىڭ نەسى ايىپ؟!»
قۋانىش پەن نۇرايىمنىڭ بالالارىمەن بىرگە دەمالىپ جاتقان شيپاجايدىڭ باعاسى ءبىر تاۋلىگىنە ادام باسىنا 1000 سوم (5000 تەڭگە) ەكەن. ءبىر كۇندىك ءۇش مەزگىل تاماعىنا 700 سوم (3500 تەڭگە) بولادى.
ەسكەرە كەتەتىن جايت، قازاقستاندىقتار قىرعىزستان مەملەكەتىنە جەكە كۋالىگىمەن وتە الادى. ال كامەلەتتىك جاسقا تولماعان بالالار شەكارادان تەك شەتەل تولقۇجاتىمەن وتەدى. ءتولقۇجات بولماعان جاعدايدا بالانىڭ اتا-انالارى كوشى-قون قىزمەت باسقارماسىنان ارنايى انىقتاما الۋى شارت.
