دەنيس تەن ءولىمى: جەلىنى شۋلاتقان مۇعالىم تەرگەلىپ جاتىر
زەلەنوۆ اۋدانى بەلەس اۋىلىندا تۇراتىن ماتەماتيكا ءپانىنىڭ مۇعالىمى شەرحان بايزەنوۆ ينستراگرامداعى پاراقشاسىندا دەنيس تەندى ولتىرگەندەردى قولداپ، جازبا قالدىرعان بولاتىن. بۇل جازبا الەۋمەتتىك جەلى قولدانۋشىلارىنىڭ اشۋ-ىزاسىن تۋدىرعاننان كەيىن ول بۇل ءىسى ءۇشىن كوپشىلىكتەن كەشىرىم سۇرادى.
ب ق و ىشكى ىستەر دەپارتامەنتىنىڭ باسپا ءسوز قىزمەتىنەن تۇسكەن مالىمەتكە قاراعاندا، قازىرگى ۋاقىتتا ش. بايزەنوۆكە قاتىستى ق ر ق ك 174-بابى 1-بولىگىنە سايكەس (الەۋمەتتىك، ۇلتتىق، رۋلىق، ناسىلدىك، تەكتىك-توپتىق نەمەسە ءدىني الاۋىزدىقتى قوزدىرۋ) قىلمىستىق ءىس قوزعالىپ، تەرگەۋ امالدارى جۇرگىزىلۋدە.
ش. بايزەنوۆتەن ەشقايدا كەتپەۋ تۋرالى قولحات الىندى.
زەلەنوۆ اۋداندىق ءبىلىم ءبولىمىنىڭ باسشىسى سەرىك سافيۋللين ورالداعى پەدكوللەدجدى بىتىرگەن ش. بايزەنوۆتىڭ بەلەس ورتا مەكتەبىندە 5-9-سىنىپتارعا ماتەماتيكا پانىنەن ساباق بەرەتىندىگىن، قازىر ەڭبەك دەمالىسىندا ەكەندىگىن جەتكىزدى. وعان قاتىستى شارا قىلمىستىق ءىس اياقتالعاننان كەيىن قولدانىلاتىن بولادى.
ايتا كەتەيىك، ق ر ق ك 174-بابى 1-بولىگىنە سايكەس قىلمىسى دالەلدەنگەن ادام ەكى جىلدان جەتى جىلعا دەيىنگى مەرزىمگە باس بوستاندىعىنان شەكتەۋگە نە سول مەرزىمگە باس بوستاندىعىنان ايىرىلۋى مۇمكىن.
ايتا كەتسەك، قازاقستاندىق مانەرلەپ سىرعاناۋشى دەنيس تەن 19- شىلدە كۇنى پىشاق جاراقاتىنان قازا بولعان ەدى. وقيعا قۇرمانعازى بايسەيىتوۆا كوشەلەرىنىڭ قيىلىسىندا 19- شىلدەدە تۇسكى ساعات 15:00 شاماسىندا بولعان. سپورتشى كولىگىنىڭ ايناسىن ۇرلاماق بولعان ەكى ادامنىڭ ۇستىنەن تۇسكەن. ارادا باستالعان جانجالدىڭ سالدارىنان ۇرىلار دەنيس تەنگە پىشاق سۇعىپ العان. ول وڭ جاق سانىنىڭ جوعارعى تۇسىنا جاراقات الدى. 25 جاستاعى تەن ءۇش ليتر قان جوعالتىپ، اۋرۋحاناعا وتە اۋىر جاعدايدا جەتكىزىلدى. ءبىراق الماتى قالالىق دەنساۋلىق ساقتاۋ باسقارماسىنىڭ باسشىسى سەرىكبول مۋسينوۆ قوسىمشا قان قاجەت ەمەستىگىن جانە رەسۋرستار جەتكىلىكتى ەكەندىگىن ءمالىم ەتكەن بولاتىن.
2,5 ساعاتقا جالعاسقان رەانيماتسيالىق شارالارعا قاراماستان، اۋرۋحانا دارىگەرلەرى ونىڭ ومىرىنە اراشا تۇسە المادى. ساعات 17.30-دا وليمپيادا جۇلدەگەرى قايتىس بولدى.
ادام ءولتىرۋ بابىمەن قىلمىستىق ءىس قوزعالدى.
