ەلىمىزدە الداعى كۇندەرى اۋا رايى قانداي بولادى؟

استانا. قازاقپارات - «قازگيدرومەت» ر م ك 24-26- شىلدەدەگى اۋا رايىنا بولجام جاسادى، دەپ حابارلايدى قازاقپارات.

جەكسەنبى كۇنى قازاقستاننىڭ سولتۇستىك جانە سولتۇستىك-شىعىس اۋداندارىنا مول جاۋىن-شاشىن اكەلگەن بيىكتىك تسيكلون باتىس ءسىبىردىڭ وڭتۇستىگىنە قاراي جىلجي باستادى.

دەگەنمەن تسيكلوننىڭ رەسپۋبليكانىڭ ورتالىق، وڭتۇستىك، وڭتۇستىك-شىعىس جانە شىعىس وبلىستارىنا ىقپالى ءالى دە بايقالادى. سوعان بايلانىستى، سىبىردەن سالقىن ءارى ىلعالدى اۋا اعىنى كەلەدى.

سوندىقتان دا الداعى ءۇش كۇندە قازاقستاننىڭ شىعىس جارتىسىندا قىسقا مەرزىمدى جاڭبىر جاۋادى، ول شىعىس جانە سولتۇستىك-شىعىس وبلىستاردا كۇشەيىپ، ءتىپتى بۇرشاق جاۋۋى دا مۇمكىن. جەل كۇشەيىپ، اۋا تەمپەراتۋراسى تومەندەيدى.

باتىس جانە وڭتۇستىك-باتىس وڭىرلەردەگى اپتاپ ىستىق از ۋاقىت باسەڭدەيدى، ارتىنشا يراننان ىستىق اۋا اعىنىنىڭ كەلۋىنە بايلانىستى تاعى دا 40...43 گرادۋسقا دەيىن كوتەرىلەدى.