استانا اۆتوبۋستارىندا جاڭا ءتارتىپ: ۆاليداتور ىستەن شىقسا، جولاۋشى تەگىن جۇرەدى
اتاپ ايتقاندا، 21 -شىلدەدەن باستاپ قالاىشىلىك اۆتوبۋستاردا قولما-قول اقشاسىز ەلەكتروندىق كارتامەن تولەۋ 90 تەڭگەنى قۇرايتىن بولادى. ەلەكتروندى كارتالاردى ساتىپ الىپ ۇلگەرمەگەندەر كوندۋكتورعا قولما-قول اقشامەن 180 تەڭگە تولەيدى. سونداي-اق جولاۋشىلار مەن باگاجدى قوعامدىق ەكسپرەسس كولىكپەن تاسىمالداۋ قولما- قول اقشامەن 250 تەڭگەنى قۇرايدى.
بۇل رەتتە، ەلەكتروندى تولەمدى قابىلدايتىن ۆاليداتورلار جۇمىس ىستەمەي تۇرسا، جولاۋشىلار اۆتوبۋستا تەگىن جۇرۋگە قۇقىلى.
وزگەرمەلى ءتاريفتىڭ ەنگىزىلەتىنى ءبىر اي بۇرىن حابارلانسا دا، كارتا الىپ ۇلگەرمەگەن جولاۋشىلار جەتەرلىك. سول سەبەپتى، كارتا ساتاتىن اۆتوماتتار قاسىندا كەزەك كوپ.
استانا LRT ناۋات ازانبايەۆانىڭ حابارلاۋىنشا، جولاقى تولەۋ ءتارتىبىنىڭ وزگەرۋىنە بايلانىستى بۇگىن كارتا ساتاتىن ءاربىر اۆتوماتتىڭ قاسىندا كەڭەسشى جۇمىس ىستەيدى جانە ولار حالىققا كارتا ساتىپ الۋدى، تەڭگەرىمدى تولتىرۋدى ۇيرەتەدى.
«اقشا تولىپ قالعان جاعدايدا ينكاسساتورلار كەلىپ جۇمىس ىستەيدى، وعان شامامەن 15-20 مينۋت ۋاقىت كەتەدى. ودان باسقا ەش ماسەلە تۋىندامايدى دەپ باعامداپ وتىرمىز. قازىر قالاداعى 30 تەرمينال %100 جۇمىس ىستەپ تۇر. استانا LRT ماماندارى باقىلاۋ جاساپ وتىر»، - دەدى ناۋات ازانبايەۆا قازاقپارات تىلشىسىنە بەرگەن سۇحباتىندا.
كومپانيا وكىلىنىڭ ايتۋىنشا، اۆتوبۋس ىشىندەگى كوندۋكتورلار ەندى ەلەكتروندىق تولەۋ جۇيەسىنىڭ كەڭەسشىسى دەپ اتالادى جانە ولاردان كولىك كارتاسىن قولما- قول اقشاعا ساتىپ الۋعا بولادى.
«كۇننىڭ العاشقى جارتىسىندا اۆتوبۋس ىشىندەگى كەڭەسشىلەر 30 مىڭ كارتا ساتىپ ۇلگەردى. ال تەرمينال مەن كاسسالاردىڭ ناتيجەسى كەشكە دايىن بولادى. كارتانى ارنايى كاسسالاردا جانە اۆتوماتتاردا نەمەسە Qiwi تەرمينالدارى ارقىلى تولتىرۋعا بولادى»، - دەپ ءوز ءسوزىن تولىقتىردى ناۋات ازانبايەۆا.
جولاۋشىلاردىڭ قوعامدىق كولىكتەن ءمىنىپ-ءتۇسۋ ءتارتىبىن ازىرگە ەشكىم ۇستانىپ جاتقان جوق. ادامدار وزىنە ىڭعايلى ەسىكتەن كىرىپ-شىعىپ ءجۇر. ال ەلەكتروندىق تولەۋ جۇيەسىنىڭ كەڭەسشىلەرى (كوندۋكتورلار) باياعىداي قولما-قول اقشامەن ەسەپتەسىپ، جولاۋشىلاردىڭ ەلەكتروندى كارتاسىن تەكسەرۋدە.
