جەمىس- جيدەك پەن كوكونىستى قالاي جۋۋ كەرەك - باس سانيتاردىڭ كەڭەسى

 قوعامدىق دەنساۋلىقتى ساقتاۋ كوميتەتىنىڭ ءتوراعاسى جانداربەك بەكشيننىڭ ايتۋىنشا، ينفەكسيالار، كوبىنەسە، ەت، جۇمىرتقا، ءسۇت ونىمدەرى، سالاتتار، كرەمدى- كونديتەرلىك ونىمدەر سياقتى تاعامداردا تەز تارالادى.

«سوندىقتان ونداي تاماقتى بولمە تەمپەراتۋراسىندا ءبىر ساعاتتان اسىرماي ساقتاۋ قاجەت. ال توڭازىتقىشتا ساقتاۋ مەرزىمى - 6-12 ساعات. دايىن تاماقتى داستارحانعا قوياردىڭ الدىندا جاقسىلاپ تۇرىپ قايناتىپ العان دۇرىس. سالاتتاردى ازداپ ىستەۋ كەرەك. قانشا جەيسىز، سونشا ىستەۋ كەرەك. نەگىزى، ەڭ قاۋىپتى تاعامدار ول - مايونەز نەمەسە قايماق قوسىلعان سالاتتار. سەبەبى ءدال سونداي تاعامدا ميكرواعزالار تەز تارايدى. سوسىن كرەمدى- كونديترلىك ونىمدەر دە قاۋىپتى. اسىرەسە، جۇمىرتقادان جاسالعان كرەمدەر تەز بۇلىنەدى. بۇدان بولەك، قۇس ونىمدەرى دە بار» - دەدى ج. بەكشين استانادا وتكەن باسپا ءسوز ءماسليحاتىندا.

باس سانيتارلىق دارىگەر جەمىس- جيدەك پەن كوكونىستەردىڭ قاۋىپسىزدىگىنە دە توقتالدى.

ونىڭ ايتۋىنشا، قۇلپىناي، ءجۇزىم، سارى ورىك، قارا ورىك، شيە سياقتى جەمىس- جيدەكتە ينفەكسيا كوپ بولادى.

«ونى جۋۋ قيىن. وعان قوسا، تازارتۋ كەرەك. سوندىقتان ءدال وسى جەمىس- جيدەكتى جاقسىلاپ تۇرىپ جۋۋ قاجەت. الدىمەن ىستىق سۋعا سالعان دۇرىس. سوسىن سالقىن سۋمەن شايۋ كەرەك. بۇدان بولەك، اس سوداسىن سۋمەن ارالاستىرىپ، ارنايى ەرىتىندى جاساۋعا بولادى. سوعان جەمىس- جيدەك پەن كوكونىستى 2-3 ساعاتقا سالسا، زەڭ، گريبوك سياقتى قاۋىپتى زاتتار كەتەدى. نەگىزى، بۇل - جاقسى دەزينفەكسيا. سودامەن جۋعاننان كەيىن سۋمەن شايۋ كەرەك. سوندا بالالارعا قورىقپاي بەرۋگە بولادى»، - دەپ اتاپ كورسەتتى ج. بەكشين.

ايتا كەتەيىك، ج. بەكشين جاز كەزىندە توي تاعامدارىن دايىنداۋ قاۋىپسىزدىگىنە دە توقتالدى. ونىڭ ايتۋىنشا، الدىمەن اسپازشىلاردىڭ كاسىبي دايىندىعىن تەكسەرىپ الۋ قاجەت. باس اسپازشىدا سانيتارلىق كىتاپشا بولۋى ءتيىس. سىرتتان ادام تارتۋعا بولمايدى. ىدىس- اياقتى جۋىپ تۇراتىن ادامداردىڭ سانى دا جەتكىلىكتى بولۋى شارت.

«سوسىن تاماقتى ساقتايتىن ارنايى قۇرال- جابدىقتاردىڭ بار- جوعىن تەكسەرىپ العان ءجون. دايىن تۇرعان تاماق توڭازىتقىشتا ساقتالۋى قاجەت. مەيرامحانادا ىستىق سۋ بولۋى ءتيىس. تازالىققا باسا ءمان بەرۋ كەرەك. نەگىزى، تاماق جاسايتىن جەردىڭ سانيتارلىق جاعدايى جاپپاي ۋلانۋعا سەبەپ بولىپ جاتادى. تويدىڭ داستارقانىن ءبىر ساعات بۇرىن جاساعان دۇرىس. ودان ەرتە جايىلسا، دايىن تاماقتا ميكرواعزالار تەز وسەدى. سودان ادام ۋلانادى. ارينە، تاماق ونىمدەرىنىڭ ساقتاۋ مەرزىمىن ۇنەمى باقىلاپ وتىرۋ قاجەت»، - دەپ اتاپ كورسەتتى ج. بەكشين.

اۆتور: ارمان اسقاروۆ