شەتەلدىكتەر جامبىل جانە تۇركىستان وبلىستارىنىڭ تاريحي ورىندارىن ارالادى

تاراز. قازاقپارات - وڭىردە جامبىل جانە تۇركىستان وبلىستارىنىڭ تاريحي-مادەني جەرلەرىنە جاسالعان «تاريحي تاعزىم» ەكسكۋرسياسى وتكىزىلدى، دەپ حابارلايدى قازاقپارات ءتىلشىسى.

اتالمىش شارا ەلباسىنىڭ «رۋحاني جاڭعىرۋ» باعدارلاماسى اياسىندا وبلىس اكىمدىگىنىڭ جاستار ساياساتى ماسەلەلەرى جونىندەگى باسقارماسىنىڭ ۇيىمداستىرۋىمەن ءوتتى.

جامبىلدىق 250 قاتىسۋشى جامبىل جانە تۇركىستان وبلىستارىنىڭ تاريحي جەرلەرىن زەرتتەۋگە اتتاندى. ەكسكۋرسيا جاستار اراسىندا ءوز ەلىنە دەگەن سۇيىسپەنشىلىكتى وياتۋدى كوزدەپ، تۋعان ولكەنىڭ تاريحى مەن مادەنيەتىنە قىزىعۋشىلىقتارىن تۋعىزۋ ءۇشىن جاسالدى. شارانىڭ نەگىزگى ماقساتى - پاتريوتتىق سەزىمدى كۇشەيتۋ.

ساياحاتقا ءوڭىردىڭ ءارتۇرلى سالالارىندا بەلسەندىلىك تانىتىپ جۇرگەن جاستار، جوعارى جانە ارناۋلى ورتا وقۋ ورىندارىنىڭ ستۋدەنتتەرى، ەرىكتىلەر، بالالار ءۇيىنىڭ تاربيەلەنۋشىلەرى جانە ب ا ق وكىلدەرى قاتىستى.

بيىلعى جىل قازاقستاندا وزبەكستان جىلى بولىپ جاريالانعاندىقتان، ەكسكۋرسياعا 15 ادامنان قۇرالعان وزبەك دەلەگاتسياسى قاتىستى.

العاشقى كۇنى جاستار قاراحان جانە داۋىتبەك كەسەنەلەرىن، تارازداعى كونە مەشىتتى، تورتكۇل تاريحي كەشەنىن تاماشالادى. سونداي-اق، ەكسكۋرسيا قاتىسۋشىلارى اقىرتاس كەشەنىنىڭ تاريحىمەن تەرەڭىرەك تانىسىپ، رىسقۇلوۆ اۋدانىنىڭ قۇلان كونە قالاشىعىنا باردى.

ەكسكۋرسيانىڭ ەكىنشى كۇنى ساياحاتشىلار «قازاق حاندىعىنىڭ 550 جىلدىعى» مونۋمەنتىنە، باۋىرجان مومىش ۇلى مەموريالدىق مۋزەيىنە، ايشا ءبيبى جانە بابادجا قاتىن كەسەنەلەرىن بارىپ قايتتى. سونىمەن قاتار، تۇركىستان وبلىسىنىڭ قازىعۇرت، بايدىبەك اۋداندارىنىڭ تاريحي جەرلەرىن تاماشالادى. ساياحات كيەلى اتانعان اق مەشىت ۇڭگىرىنە، قوشقار اتا، بايدىبەك اتا، دومالاق انا كەسەنەلەرىنە بارىپ، تاعزىم ەتۋگە ۇلاستى.

شارا سوڭىندا بارلىق قاتىسۋشىعا ارنايى كۋالىكتەر تابىس ەتىلدى.