الماتىداعى «الىپ تيىنگە» قانشا قارجى كەتتى

الماتى. قازاقپارات - الماتىدا «اتاكەنت» ورتالىق كورمە كەشەنىنىڭ كىرەبەرىسىندە پابليكتەر الەمىندەگى ەڭ ءىرى ارت-نىساننىڭ اشىلۋ سالتاناتى ءوتتى.

التىن ءتيىن پىشىندەس نىساننىڭ بيىكتىگى - 12 مەتر، سالماعى - 12 توننا، دەپ حابارلايدى قازاقپارات ءتىلشىسى.

«ءتيىننىڭ قۇنى ميلليارد تەڭگە ەمەس. عالامتوردا تاراعان اقپارات - جالعان. ءتيىن - مەملەكەت پەن Funk اگەنتتىگىنىڭ بىرلەسىپ جۇزەگە اسىرعان جوباسى. مەملەكەت تاراپىنان 15 ميلليون تەڭگە قارجى جۇمسالدى، ال جوبانىڭ جالپى قۇنى 23 ميلليون تەڭگەنى قۇرادى»، - دەدى Funk اگەنتتىگىنىڭ باسشىسى مايرا يزمايلوۆا.

وسى ماۋسىمدا تيىننەن بولەك 15 ارت-نىساندى ورناتۋ جوسپارلانعان. اتالمىش جۇمىستاردىڭ بارلىعىن قازاقستاندىق ونەر قايراتكەرلەرى جاساعان. 16 نىساننىڭ جالپى قۇنى 78 ميلليون تەڭگە بولدى. بۇل سوماعا بايقاۋدىڭ ۇيىمداستىرىلۋى، سونداي-اق، ءتيىننىڭ اۆتورى الەكس رينسلەردىڭ قاتىسۋى كىردى. شىعىننىڭ ءبىراز بولىگىن Funk اگەنتتىگى كوتەرگەن. بۇل جونىندە الماتى قالاسىنىڭ مادەنيەت باسقارماسى باسشىسىنىڭ ورىنباسارى نايليا مۋليۋكوۆا ءمالىم ەتتى.

جاڭا ارت- نىساننىڭ «اتاكەنت» كورمەسىنە قاراما- قارسى ورناتىلعانى تۋرالى 8 -شىلدەدە بەلگىلى بولعان. ول الەۋمەتتىك جەلى پايدالانۋشىلارىنىڭ بىردەن قىزىعۋشىلىعىن تۋدىرعان. ءتيىن شامامەن 9 ايداي سول جەردە تۇراتىن بولادى.

نىساننىڭ اۆتورى - الەكس رينسلەر ەسىمدى ۇلى بريتانيالىق سۋرەتشى. ونىڭ جۇمىستارى قالاعا جاڭا رەڭك بەرىپ، تۇرعىنداردىڭ كوڭىلىن اۋدارۋعا ارنالعان.