استانادا جاڭا تۋعان نارەستەلەرگە ارنالعان سىيلىق نەلىكتەن بارلىعىنا بەرىلمەيدى

استانا. قازاقپارات - استانا قالاسىنىڭ قوعامدىق دەنساۋلىق ساقتاۋ باسقارماسى جاڭا تۋعان شاقالاقتاردىڭ بارلىعىنا بىردەي سىيلىقتىڭ بەرىلمەۋى تۋرالى الەۋمەتتىك جەلىلەردەگى حابارلامالارعا تۇسىنىك بەردى.

«بۇگىن تانىس كەلىنشەك انا مەن بالا ورتالىعىندا بوساندى. ايتۋىنشا، وندا ادام وتە كوپ. سابيلەرگە ارنالعان ەشقانداي سىيلىق بەرىلىپ جاتقان جوق»، - دەپ جازدى ايدار باتىر ەسىمدى ازامات فەيسبۋكتەگى توپتاردىڭ بىرىنە.

قالالىق قوعامدىق دەنساۋلىق ساقتاۋ باسقارماسى جاڭا تۋعان شاقالاقتارعا سىيلىق بەرۋ اكسياسى ەلوردا كۇنىنە وراي بىركۇندىك بولعانىن اتاپ ءوتتى.

«اتالمىش اكسيا بىركۇندىك بولدى. ول استانا قالاسىنىڭ بارلىق پەريناتالدىق ورتالىقتارىندا 6- شىلدە كۇنى ساعات 00.00-دەن 7- شىلدە كۇنگى ساعات 00.00-گە دەيىن جالعاستى. اكسيا استانانىڭ 20 جىلدىق مەرەيتويىنا ارنالدى»، - دەلىنگەن باسقارمانىڭ حابارلاماسىندا.

ءمالىم ەتىلگەندەي، وسى كۇنى بوسانعان ايەلدەردىڭ بارلىعىنا سابيگە قاجەتتى كيىم-كەشەكتەر مەن زاتتاردىڭ جيىنتىعى تارتۋ ەتىلدى.

باسقارمانىڭ اتاپ وتۋىنشە، 2018-جىلدىڭ 1- تامىزىنان باستاپ مۇنداي سىيلىقتار جاڭادان بوسانعان جالعىزباستى انالارعا، كوپبالالى انالارعا جانە مۇگەدەك ايەلدەرگە بەرىلەتىن بولادى.

ايتا كەتەيىك، بۇعان دەيىن استانا اكىمدىگى جاڭا ءداستۇر قالىپتاستىرعانى، ەندىگىدە قالادا تۋعان ءاربىر سابيگە 17 زاتتان تۇراتىن جيىنتىق سىيعا بەرىلەتىنى تۋرالى اقپارات تاراتىلعان بولاتىن. جيىنتىق سومكەگە: توقىما كەۋدەشە، توقىلعان باس كيىم، قولعاپتار، توقىلعان جامىلعى، 2 جايالىق، 2 جەيدە، 2 تەلپەك، 4 جۇپ شۇلىق، كونۆەرت، سابيدىڭ الجاپقىشى، سومكە جانە ت. ب. ەندى.