الماتىلىقتار «نۇرسۇلتان» شىڭىن باعىندىردى
5000 نان استام 12 جاستان اسقان كەز كەلگەن قاتىسۋشى 4376 مەتر بيىكتىكتى باعىندىرۋعا نيەت بىلدىرگەنىمەن، تەك 200 دەن استامى عانا شىڭعا شىقتى. قاتىسۋشىلاردىڭ اراسىندا وزگە مەملەكەتتەن كەلگەن قوناقتار جانە الماتى قالاسى دەنە شىنىقتىرۋ جانە سپورت باسقارماسى باسشىسى ءابىل دوڭبايەۆ تا بولدى. الپيانيادا باستالعان سوڭ ارتىنشا «شىمبۇلاق» تاۋ شاڭعى كۋرورتىندا سكايراننينگ سپورتىنان بىرنەشە جاس ايىرماشىلىق بويىنشا قازاقستان چەمپيوناتى وتكىزىلدى. 100 دەن استام سپورتشى باعىن سىناپ كورۋگە تىرىستى. سولاردىڭ ءبىرى، جۇلدەلى ورىن العان راۋان ابۋلحانوۆ ءوز ويىمەن ءبولىستى.
- دايىندىق تاۋدا ەمەس، قالادا ءوتتى. ءوزىم وسى جارىسقا ءجيى قاتىسامىن. ماعان جۇگىرگەن وتە ۇنايدى. بۇگىن ءوز جاسىم بويىنشا ءبىرىنشى، ال، «ابسوليۋتتە» ءۇشىنشى ورىن الدىم. ۋاقىتىم 1 ساعات 53 مينۋت، - دەدى اسكەري ينستيتۋتىنىڭ سەرجانتى راۋان ابۋلحانوۆ.
بارلىق جۇلدەگەرلەر مەن جەڭىمپازدار مەدالدارمەن، ال، الپينيادا قاتىسۋشىلارى سەرتيفيكاتپەن ماراپاتتالدى. بۇل ءىس- شارانىڭ اشىلۋ سالتاناتىندا ەلىمىزدىڭ بەلگىلى ءالپينيسى ماقسۇت جۇمايەۆ قوناقتاردى استانا كۇنىمەن قۇتتىقتاپ، الپينيزممەن اينالىسۋعا كەڭەس بەردى. ارتىنشا بۇل مەرەكە انشىلەردىڭ ونەرلەرىمەن جالعاستى. ايتا كەتەر جايت، الپينيادا «شىمبۇلاق - نۇرسۇلتان شىڭى» سالاۋاتتى ءومىر سالتىن ۇستانىپ، جاستار اراسىندا سپورتتى دامىتۋ ماقساتىندا جىل سايىن وتكىزىلەدى.
Massaget.kz
