استانادا قازاقستاندىق بوكسشى قارسىلاسىن «قورقىتىپ» جەڭدى

استانا. قازاقپارات -قازاقستاندىق كاسىپقوي بوكسشى بەيبىت شۇمەنوۆتىڭ كەشەگى بوكس كەشى اياسىندا قازاق بوكسشىسى ايدوس ەربوسىن ۇلى ازەربايجاندىق يسمات ەينۋللايەۆتى جەڭدى، دەپ حابارلايدى قازاقپارات ءتىلشىسى.

العاشقى راۋندتا قازاقستاندىق بوكسشى كوپ سوققىلاردى جىبەرۋگە اسىعا قويعان جوق. قارسىلاسىنىڭ اڭىسىن اڭدۋ ءۇشىن ول الدىمەن وزىنە ىڭعايلى قاشىقتىقتى تاڭداپ الۋعا دەن قويدى. ەينۋللايەۆ بىردەن شابۋىلعا كوشىپ، ءبىر سوزبەن «قولىنداعى كارتانىڭ بارلىق كوزىرىن كورسەتىپ قويدى».

ازەربايجاندىقتىڭ شاما- شارقىن بىلگەن قازاق بوكسشىسى وسىدان كەيىن باسىمدىق تىزگىنىن ءوز قولىنا العان ەدى. ءبىرىنشى راۋندتان كەيىن قازاق بوكسشىسىنىڭ قارقىنىنان جاسقاندى ما - قارسىلاس كوماندانىڭ تاراپى ءوز بوكسشىسىن شارشى الاڭعا جىبەرۋدەن باس تارتتى. ايدوس قازاقى شاپانىن كيىپ، تورەشى ونىڭ قولىن كوتەردى. بۇل جەڭىس ەربوسىننىڭ كاسىپقوي بوكستاعى سەگىزىنشى قۋانىشى. سەگىز ايقاستىڭ جەتەۋىن ايدوس مەرزىمىنەن بۇرىن اياقتاعان.

 اۆتور: ايان بەكەن ۇلى