سەمەيلىك عالىمدار ەرەكشە بەلبەۋ ويلاپ تاپتى

استانا. قازاقپارات - شوققا قارسى پنيەۆماتيكالىق جامباس بەلبەۋى - بۇل سەمەي قالاسىنىڭ مەملەكەتتىك مەديتسينا ۋنيۆەرسيتەتى عالىمدارىنىڭ كوپ جىلعى ىزدەنىستەرىنىڭ ناتيجەسى.

ول جامباس جاراقاتىنان كەلەتىن ءولىم-ءجىتىم مەن مۇگەدەكتى الدىن الۋعا باعىتتالعان مەديتسينالىق قۇرىلعى. بۇل تۋرالى altaynews جازادى.

جامباس سۇيەكتەرىنىڭ زاقىمدانۋى - بۇل ەڭ اۋىر جاراقات ءتۇرىنىڭ ءبىرى. قيىندىعى سول، ونىڭ سالدارىنان كوپ مولشەردە قان كەتىپ، ادام قاتتى اۋىرسىنۋى ىقتيمال. قازاقستاندا تىركەلەتىن ءولىمنىڭ ۇشتەن ءبىر بولىگىنە وسى سەبەپ. جاعىمسىز كورسەتكىشتى ءتۇسىرۋ ماقساتىندا مەديتسينا ۋنيۆەرسيتەتىنىڭ وقىتۋشىلارى جانە دارىگەرلەرى ارنايى قۇرىلعىنى ويلاپ تاپتى. ونىڭ كومەگىمەن اۋرۋدى اسقىندىرماي الدىن الۋعا بولادى ەكەن.

عىلىمي جوبا 2016-2019-جىلدارعا ارنالعان «دەنساۋلىق» باعدارلاماسى اياسىندا قولعا الىندى. وسى ارقىلى رەسپۋبليكاداعى جەدەل مەديتسينالىق كومەكتى جەتىلدىرۋ كوزدەلگەن. ارنايى اپپارات ءبىلىم جانە عىلىم مينيسترلىگى تاعايىنداعان گرانت ەسەبىنەن ازىرلەنىپ وتىر.

قۇرىلعى - ۇزىندىعى 110 سانتيمەتر جانە ەنى 30 سانتيمەتردى قۇرايتىن قوسپالى ماتادان تۇرادى. سول سياقتى وڭ جانە سول جاعىندا ارنايى قالتاشالارى جانە اۋا ايداعىش سورعىسى بار. بۇدان باسقا بەلبەۋ مونومەترمەن قامتىلعان. ول مانجەتتەگى اۋا قىسىمىن قاداعالاۋعا مۇمكىندىك بەرەدى.

مەديتسينالىق ءونىم ءوزىنىڭ تيىمدىلىگىن كورسەتە باستاسا، ونى جاپپاي وندىرىسكە ەنگىزۋ جوسپارلانۋدا. يدەيانىڭ نەگىزگى اۆتورلارى مەديتسينا عىلىمدارىنىڭ دوكتورى، جوعارى ساناتتاعى تراۆماتولوگ-ورتوپەد دارىگەر ەرسىن ءجۇنىسوۆ، سونداي-اق استاناداعى 1№ قالالىق اۋرۋحاناسىنىڭ پوليتراۆما ءبولىمىنىڭ مەڭگەرۋشىسى رۋسلان بوتايەۆ.

مۋلتيورتالىقتىق زەرتتەۋ شەڭبەرىندە پنيەۆماتيكالىق بەلبەۋدى Pneumatic anti-shock pelvic belt (PAPb) استانا، الماتى جانە سەمەي قالاسىنداعى جەدەل مەديتسينالىق كومەك ستانتسياسىنىڭ جۇمىسىنا، سول سەكىلدى اتالعان شاھارلارداعى اۋرۋحانالاردىڭ قابىلداۋ بولىمدەرىنە ەنگىزۋ قاراستىرىلىپ وتىر.

ايتا كەتەيىك، جامباس جاراقاتى اسىرەسە جول- كولىك وقيعالارىندا ءجيى ورىن الادى. سول سەبەپتى وسى بىرەگەي اپپاراتپەن اق حالاتتىلار اۋىر جاراقاتتاردىڭ سانىن ازايتۋدى جوسپارلاۋدا.