دەپۋتات باليەۆا وزبىر كۇيەۋىنەن قاشىپ قۇتىلعان كەلىنشەكتىڭ وقيعاسىن ايتىپ بەردى
باليەۆانىڭ سوزىنە قاراعاندا، ءاليا ەسىمدى ايەل ەرتە تۇرمىسقا شىعىپ، ءۇش بالا تاپقان. تۇڭعىش قىزى 14-تە، ەكىنشى ۇلى 9 جاستا، ال كەنجەسى - ءبىر جاستان اسقان. نەكە كەزەڭىندە ول كۇيەۋىنىڭ ۇنەمى ۇرىپ-سوعۋى مەن قورلاۋىنا، ماس كۇيىندەگى قىلىقتارىنا شىداپ كەلگەن. قىز اتا-اناسىنا كەتۋگە تىرىسسا دا، ولار وسەك-اياڭنان، تۋىسقانداردىڭ سوزىنەن قورقىپ، ۇنەمى قىزىن كۇيەۋىنە قايتارىپ وتىرعان.
«ءبىر كۇنى قىستا كۇيەۋى ۇيگە قايتا ماس كۇيىندە كەلدى. جالاڭاش دەرلىك كۇيدە قىز بالالارىمەن تەز ارادا دالاعا شىعىپ، ۆوكزالعا جول تارتقان. ول ءاردايىم كۇيەۋى ماس بولىپ كەلگەندە سولاي جاساعان، سەبەبى ول ايەلىن عانا ەمەس، بالالارىنا دا قول كوتەرەتىن. تەمىرجول ستانسياسىندا قىز ءبىر ايەلمەن تانىسقان. نەگە ەكەنى بەلگىسىز ول ايەلگە بارلىق جاعدايىن ايتىپ وتىرعان. بالكىم قيىندىقتارىن بولىسەتىن ادام كەرەك بولعان شىعار. ايەل باسقا قالادا تۇراتىن قۇربىسىمەن حابارلاسادى. اتىن جاننا دەلىك. ول كىسى ءاليانى بالالارىمەن ءوزىنىڭ ۇلكەن ۇيىندە قۋانا قابىلدايتىنىن ايتادى. ءسويتىپ، ايەل ولارعا جاقىن ارادا جۇرەتىن اۆتوبۋسقا بيلەت الىپ بەرىپ، ءاليا بالالارىمەن الماتىعا جاڭا ومىرگە جول تارتادى»، - دەپ جازدى زاعيپا باليەۆا. ول كەزدە ءاليا 35 جاستا ەدى، ول ەشقاشان ومىرىندە جۇمىس ىستەمەگەن، ساۋاتى از ەدى. الايدا، بالالارىمەن الماتىعا كەلگەننەن جۇمىس ىزدەي باستاعان. كوپ ۇزاماي وعان ءۇي قىزمەتشىسى جۇمىسى ۇسىنىلدى. ءسويتىپ ءاليا ءوزىنىڭ العاشقى تابىسىن تاپتى.
كەيىنىرەك ءاليا جەكە تاپسىرمالاردى قابىلداي باستادى. تازالاۋ جۇمىسىمەن اينالىستى. ءوز ءىسىن جاقسى جاساعانى سونشالىق، ەكى ايدىڭ ىشىندە كليەنتتەر كەزەككە تۇراتىن بولدى. وسى ۋاقىتقا دەيىن وعان قامقور بولعان ايەل - ونىڭ جەتىستىگىنە قۋانىپ، قۇجاتتارىن راسىمدەۋگە، بالالارىن مەكتەپكە، بالاباقشاعا بەرۋگە كومەكتەسەدى. ال ءتورت ايدان سوڭ ءاليا ءوزى پاتەر جالداي باستاپتى.
«ءبىر جىل ءوتتى. بالالار مەكتەپكە جانە بالاباقشاعا بارادى. جاننا ءاليانىڭ ۇيىنە ءجيى كەلىپ تۇرادى، ءاليا دا بالالارىمەن جانناعا قوناقتاپ كەلەدى. وسى ۋاقىت ارالىعىندا ولار تۋىستاي بولىپ كەتتى. ال ءاليانىڭ كۇيەۋىنە قايتا ورالۋىن سۇراعان اتا-اناسى تىنىشتالىپ، وعان ءوزى ءومىر سۇرۋىنە مۇمكىندىك بەردى. كۇيەۋى ناعىز قورقاق ادام بولىپ شىقتى، جاننا وعان اجىراسۋعا كومەكتەستى. ەندى ءاليا باقىتتى جانە ول قورقىنىشسىز بولاشاققا قارايدى»، - دەيدى باليەۆا. دەپۋتات وقيعانىڭ شىن ەكەنىن جازادى. بۇل دەر كەزىندە ادامعا قول ۇشى سوزىلسا، ونىڭ ءومىرى وزگەرەتىنىنە مىسال.
Kaz.tengrinews.kz
