مەيرامبەك بەسبايەۆ: ەشكىمنىڭ جولىنا دا، قىزمەتىنە دە تالاسقان ەمەسپىن
«قادىرلى، دوستار! وكىنىشكە وراي، ءبىزدىڭ ارامىزدا قۋانىشقا ورتاقتاسا المايتىن، ءىشتارلىعى بار ادامدار دا كەزدەسەدى. ءوزى ۇستاز، ءوزى جۋرناليست- عالىم مىرزانتاي جاقىپ دەگەن اعامىز فەيسبۋكتە مەنى عالىم بولىپ بىرەۋدىڭ ورنىن تارتىپ العالى جۇرگەن ادامداي سيپاتتاپتى. مەنىڭ ونەردە ءوز جولىم بار. ەشكىمنىڭ جولىنا دا، قىزمەتىنە دە تالاسقان ەمەسپىن. بالا كۇنىمنەن مۋزىكا مەكتەبىندە وقىدىم. ۇلتتىق كونسەرۆاتوريادا ءبىلىمىمدى جەتىلدىرىپ، ت. جۇرگەنوۆ اتىنداعى تەاتر جانە ونەر اكادەمياسىن ءبىتىردىم. جاڭا زامان تالابىنا ساي سول وقىعان ءبىلىمىمدى دامىتۋ ءۇشىن «مادەنيەت تانۋ» ماماندىعى بويىنشا ماگيستراتۋرانى جالعاستىردىم. ەكونوميكا، زاڭ، فيزيكا سياقتى باسقا سالانى قۋعان جوقپىن. ەل ءسوز قىلماسىن دەپ اشىق ديسسەرتاتسيا قورعاۋعا دا كەلىسىم بەردىم. كەلگەن ادامداردىڭ ءبارى قورعاۋدىڭ قالاي وتكەنىن كوزدەرىمەن كوردى. تۇركيانىڭ، ازەربايجاننىڭ ەلشىلىگىنەن دە ارنايى وكىلدەر قاتىسىپ وتىردى. ءوز سالام بويىنشا ءبىلىمىمدى جەتىلدىرۋگە مەنىڭ دە قۇقىم بار دەپ ويلايمىن. كەيدە وسىنداي ساتتەردە كىمنىڭ دوس، كىمنىڭ دۇشپان ەكەنى دە بەلگىلى بولىپ قالادى. مەن ەشكىمگە جاماندىق تىلەمەيمىن. بارشاڭىزعا تەك قۋانىش تىلەيمىن» ، - دەپ جازدى مەيرامبەك بەسبايەۆ ينستاگرامداعى پاراقشاسىندا.
ايتا كەتەيىك، مىرزانتاي جاقىپ فەيسبۋكتەگى پاراقشاسىندا «قازاقستان رەسپۋبليكاسىنىڭ مەملەكەتتىك قىزمەت ىستەرى جانە سىبايلاس جەمقورلىققا قارسى ءىس- قيمىل اگەنتتىگى مەن ءبىلىم جانە عىلىم مينيسترلىگىنىڭ نازارىنا!» دەپ پوست جاريالاعان بولاتىن.
«كەيىنگى 6-7 -جىلدا (2011 -جىلدان باستاپ) ەلىمىزدەگى ىرگەلى ۇلتتىق ۋنيۆەرسيتەتتەردىڭ ماگيستراتۋرالارى مەن PhD دوكتورانتۋرالارىنا مەملەكەتتىك ءبىلىم گرانتتارى بويىنشا وقۋعا ءتۇسىپ، ماگيسترلىك جانە دوكتورلىق جۇمىستارىن قورعاپ، اكادەميالىق جانە عىلىمي اتاق- دارەجەلەر الىپ جاتقان «ءانشى- تەلە- جۇلدىزداردىڭ» ، سونداي- اق ءبىلىم جانە عىلىم سالالارىنا مۇلدەم قاتىسى جوق باسقا دا ازاماتتاردىڭ اعىلشىن، وزگە دە شەتەل تىلدەرىنەن ەمتيحانداردى قالاي تاپسىرعانىنا، جازعان ديسسەرتاتسيالارىنا جانە وتاندىق، شەتەلدىك عىلىمي جۋرنالدارعا جاريالاعان ماقالالارىنا رەسمي تۇردە ارنايى تەكسەرۋ جۇمىستارىن جۇرگىزۋلەرىڭىزدى سۇرايمىن!» ، - دەپ جازعان ەدى ول.
