ب ا ق مەرەكەسى: قازاقپارات اتىنا قۇتتىقتاۋلار لەگى كەلىپ ءتۇستى

استانا. قازاقپارات - بۇگىن ەلىمىزدە بۇقارالىق اقپارات قۇرالدارى قىزمەتكەرلەرىنىڭ، سونىمەن بىرگە بايلانىس سالاسى ماماندارىنىڭ كاسىبي مەرەكەسى كەڭىنەن اتاپ وتىلۋدە. مەرەيلى مەرەكەگە بايلانىستى «قازاقپارات» حالىقارالىق اقپارات اگەنتتىگى اتىنا جان-جاقتان قۇتتىقتاۋلار لەگى كەلىپ ءتۇسۋدە. وسى ورايدا قۇتتىقتاۋ حاتتارىنىڭ ءبىرقاتارىن جاريالاۋدى ءجون كوردىك.

اتاپ ايتقاندا، ق ر ۇكىمەت باسشىسى باقىتجان ساعىنتايەۆ قازاقپارات ۇجىمىنا ارنايى قۇتتىقتاۋ حاتىن جولدادى.

«ۇجىمدارىڭىزدى كاسىبي مەرەكە - بايلانىس جانە اقپارات قىزمەتكەرلەرىنىڭ كۇنىمەن شىن جۇرەكتەن قۇتتىقتايمىن! مارتەبەلى جۋرناليست ماماندىعى قاشان دا زور قۇرمەتكە لايىق. وقىرماندارىڭىزدى ەڭ ماڭىزدى ءارى وزەكتى تاقىرىپتار بويىنشا حاباردار ەتىپ، مەملەكەتتىك ورگانداردىڭ جۇمىسىن تۇسىندىرە وتىرىپ، الەۋمەتتىك-ەكونوميكالىق مىندەتتەردىڭ وڭتايلى شەشىلۋىنە، ەلىمىزدىڭ دامۋىنا جانە قوعامداعى تۇراقتىلىقتى نىعايتۋعا قولداۋ كورسەتىپ كەلەسىزدەر. سىزدەردىڭ كۇندەلىكتى جۇمىستارىڭىز، كاسىبي ىستەرىڭىز بەن ەرەن ەڭبەكتەرىڭىز ەلىمىزدى ودان ءارى دامىتۋعا ىقپال ەتەتىنىنە سەنىمدىمىن»، - دەپ جازدى ق ر پرەمەر- ءمينيسترى.

ال ق ر كونستيتۋتسيالىق كەڭەسىنىڭ ءتوراعاسى قايرات ءمامي «قازاقپارات» ح ا ا قازاقستاننىڭ اقپاراتتىق كەڭىستىگىندە دەموكراتيا قۇندىلىقتارىنىڭ قارقىندى دامۋىنا زور ۇلەس قوسىپ وتىرعاندىعىن اتاپ وتكەن. «ورتاق جەتىستىكتەرىمىزدى پاش ەتەتىن جانە ءادىل سىندى ماتەريالدار ءۇشىن العىسىمدى بىلدىرەمىن. ولاردىڭ وزەكتى ماسەلەلەردى ءتيىمدى شەشۋدە بەرەر كومەگى زور، ەكىجاقتى بايلانىسىمىزدىڭ نىعايا تۇسەتىندىگىنە كامىل سەنىمدىمىن»، - دەدى ق. ءمامي.

جاڭادان قۇرىلعان تۇركىستان وبلىسىنىڭ اكىمى جانسەيىت تۇيمەبايەۆ ءبىزدىڭ اگەنتتىكتىڭ ۇجىمىن ارنايى قۇتتىقتادى.

«جۋرناليستەر ەلىمىزدىڭ الەۋمەتتىك-ەكونوميكالىق سالالارىنداعى وركەندى وزگەرىستەردى ناسيحاتتاپ، ماسەلەنى ورنىمەن قوزعاپ، قوعامدى العا جەتەلەۋ جولىندا ەڭبەك ەتىپ كەلەدى. بيىل اسەمپاز قالا - استاناعا 20 جىل تولىپ وتىر. ەلوردامىزدىڭ دامۋىندا بارشاڭىزدىڭ ەڭبەگىڭىز بار دەپ ەسەپتەيمىن. سىزدەردى بايلانىس جانە اقپارات قىزمەتكەرلەرى كۇنىمەن قۇتتىقتايمىن»، - دەدى ج. تۇيمەبايەۆ.

ءوز كەزەگىندە ق ر ورتالىق سايلاۋ كوميسسياسىنىڭ ءتوراعاسى بەرىك يماشيەۆ ەلىمىزدە بولىپ جاتقان ەلەكتورالدىق پروتسەستەردى ايقىن تۇسىندىرگەنى ءۇشىن «قازاقپارات» ۇجىمىنا ەرەكشە العىسىن جەتكىزدى. وسى ورايدا و س ك ءتوراعاسى تىلشىلەرگە شىعارماشىلىق شابىت تىلەي وتىرىپ، جاڭا جوبالاردىڭ ويداعىداي جۇزەگە اسۋىنا تىلەكتەس ەكەنىن اتاپ ءوتتى.

ق ر قورعانىس جانە اەروعارىش ونەركاسىبى ءمينيسترى بەيبىت اتامقۇلوۆ تا ءوزىنىڭ ىزگى لەبىزىن ارناپ، حات جولدادى.

«سىزدەر ءبىر عاسىرعا جۋىق تاريحى بار، ەلىمىزدە عانا ەمەس، شەتەلدەردە دە ميلليونداعان وقىرمانى بار، الەمگە بەس تىلدە حابار تاراتاتىن قازاقستانداعى باستى اقپاراتتىق اگەنتتىك رەتىندە بەلگىلى بولىپ وتىرسىزدار. ەلباسىمىزدىڭ جاسامپاز يدەيالارىنىڭ توڭىرەگىنە قوعامدى توپتاستىرۋعا، ۇلتتى ۇيىستىرۋعا زور ۇلەس قوسىپ كەلەسىزدەر. سىزدەر ەڭ باستى بايلاعىمىز - تاۋەلسىزدىگىمىزدىڭ باياندى بولۋى ءۇشىن ەڭبەك ەتىپ جۇرسىزدەر. وسى جولداعى ەڭبەكتەرىڭىزگە تولايىم تابىس تىلەيمىن!»، - دەيدى مينيستر.

مۇنىمەن قوسا، ق ر ءدىن ىستەرى جانە ازاماتتىق قوعام ءمينيسترى دارحان كالەتايەۆ «قازاقپارات» ءدىن مەن ازاماتتىق قوعام سالاسىنداعى مەملەكەتتىك ساياساتتى جۇرگىزۋدە ەرەكشە ۇلەس قوسىپ كەلە جاتقانىن اتاپ ءوتتى.

بۇدان بولەك، ق ر ۇلتتىق وليمپيادالىق كوميتەتى ەلىمىزدە سپورتتىڭ دامۋى باعىتىن ايقانداۋدا ءبىزدىڭ ۇجىمنىڭ قوساتىن ۇلەسى ولشەۋسىز ەكەنىن جازعان.

«سىزدەر اتلەتتەر مەن جانكۇيەرلەردى بايلانىستىرىپ، ولاردىڭ سپورتتاعى جەڭىسى مەن جەتىستىكتەرىنىڭ نەگىزگى جارشىسى بولىپ جۇرسىزدەر. «قازاقپارات» سپورتتى حالىققا جاقىنداتۋدا ەلەۋلى ۇلەس قوسىپ كەلەدى. قازاقستانداعى وليمپيادالىق قوزعالىستى دامىتۋعا قوسقان ۇلەستەرىڭىز ءۇشىن العىس ءبىلدىرىپ، ەڭبەكتەرىڭىزگە تابىس تىلەيمىز!»، - دەدى ق ر ۇ و ك ۇجىمى.