تانىمال اكتەر راحمان وماروۆتىڭ ايەلى پاتەر جالداۋشىلاردىڭ قولىنان قازا تاپتى

الماتى. قازاقپارات - الماتىدا بەلگىلى اكتەر، تەلەجۇرگىزۋشى راحمان وماروۆتىڭ ءبىرىنشى ايەلى گۇلدەرايىم وماروۆا كىسى قولىنان قازا تاپتى.

ايەل پاتەراقىسىن الۋعا بارعان كەزدە ونى پاتەر جالداپ تۇرعان ايەلدەر پىشاقتاپ تاستاعان، دەپ حابارلايدى قازاقپارات ءتىلشىسى.

قايعىلى وقيعا تۋرالى وتباسىنىڭ ونەردەگى جولداسى قاراگوز سۇلەيمەنوۆا ينستاگرامداعى پاراقشاسىندا جاريالادى.

«جانىمىز قۇلازىپ، جۇرەگىمىز جىلاپ وتىر. ورنى تولماس قازا. دۇيسەنبى كۇنى گۇلدەرايىم وماروۆادان ايىرىلىپ قالدىق. تاپا- تال تۇستە كىسى قولىنان قازا تاپتى. زاماننىڭ ايۋاندالعانى سونشالىق، كۆارتيرانتتارىنان اقشا الۋعا بارعاندا 30 دىڭ توڭىرەگىندەگى ەكى ايەل پىشاقتاپ ولتىرگەن. اللا جازالارىن بەرسىن. مىنەزگە باي، كوپشىل، تاربيەلى، قازاقتىڭ داناگوي قىزدارىنىڭ ءبىرى ەدى. وتە كىشىپەيىل، اسا يناباتتى، جايدارى ءجۇزى كوڭىلىمىزدەن كەتپەيدى»، - دەدى قاراگوز سۇلەيمەنوۆا.

مارقۇمنىڭ دەنەسى كەشە جەر قوينىنا تاپسىرىلدى.

ايتا كەتۋ كەرەك، گۇلدەرايىم وماروۆانىڭ ارتىندا ءۇش ۇلى قالدى.

«تۇڭعىشتارىنىڭ اتىن راحمان ەكەۋى دوسحان دەپ قويىپ ەدى. ول بالا چەحيادا ەكىنشى كۋرستى اياقتادى. ەكىنشى ۇلى مەكتەپ ءبىتىردى. كەنجەسى 8 جاستا. راحمان ومار ەكەۋىنىڭ ءومىر جولدارى كوز الدىمىزدا ءوتتى. ءومىر بويى ەرىنىڭ ابىرويىن اسقاقتاتىپ، ازاماتتارىنا تالماي تاربيە بەردى. بۇگىن جەر قوينىنا تاپسىردىق. اللانىڭ قالاۋى بولار، ورتامىزدان مەزگىلسىز كەتتى. ارتىندا قالعان ۇلدارىنا اناسىنىڭ كورمەگەن قىزىعىن، جاساماعان جاسىن بەرسىن. اللانىڭ بۇيرىعىنا امال جوق. جاتقان جەرى جايلى، توپىراعى تورقا بولسىن. جانى ءجاناتتا بولعاي. الدى پەيىش، ارتى كەنىش بولسىن. اللام ۇرپاقتارىنا ءومىر بەرسىن. ماڭگى جۇرەگىمدەسىڭ»، - دەدى قاراگوز سۇلەيمەنوۆا.

ازىرگە قالالىق ءى ءى د اتالعان دەرەككە بايلانىستى تۇسىنىكتەمە بەرمەدى. «قازاقپارات» اتالعان وقيعاعا بايلانىستى قالالىق ءى ءى د- گە ساۋال جولدادى.