ارمان شورايەۆ: «كاسپي بارىسىن» وتكىزۋ جوسپارىمىزدا بار

استانا. قازاقپارات - «قازاقستان بارىسى» قورىنىڭ ءتوراعاسى ارمان شورايەۆ قازاق كۇرەسىنىڭ ءورىسىن كەڭەيتۋ باعىتىنداعى جوسپارلارىمەن ءبولىستى، دەپ حابارلايدى قازاقپارات ءتىلشىسى.

«اماندىق بولسا، تۋرنيردى (قازاقستان بارىسىن - اۆت.) باسقا قالالاردا دا وتكىزەتىن ويلارىمىز بار. جالپى، وزدەرىڭىز بىلەتىندەي، ءبىزدىڭ «الەم بارىسى» جوبامىز ءوتىپ جاتىر. ول جوبامىزدى مىسالى پاۆلودار قالاسىندا وتكىزگەن بولاتىنبىز. ونى الماتى قالاسىندا بيىل جەلتوقساننىڭ بىرىندە وتكىزەيىك دەپ وتىرمىز. «ەۋرازيا بارىسىنىڭ» دا بارىنان حاباردارسىزدار. اماندىق بولسا، تالدىقورعاندا سول تۋرنيردى وتكىزەيىك دەگەن جوسپارىمىز بار. جالپى، ءبىزدىڭ وبلىستاردىڭ اكىمدەرى «ءبىز نەگە وتكىزبەيمىز؟» دەپ سۇراپ جاتىر. وسى سەبەپتى، ءساتىن سالسا قازاق كۇرەسىنىڭ گەوگرافياسىن بارىنشا كەڭەيتەمىز. تاعى كاسپي تەڭىزىنىڭ جاعاسىنداعى مەملەكەتتەرگە ارنالعان «كاسپي بارىسى» دەگەن جوبا دۇنيەگە كەلەتىن شىعار... »، - دەيدى ول.

ارمان شورايەۆ جۋىقتا قازاق كۇرەسىنەن باتۋميدە وتكەن ەۋروپا چەمپيوناتىنىڭ وتكەنىن ەسكە سالدى.

«حالىقارالىق قازاق كۇرەسى فەدەراتسياسىنىڭ باسشىسى قانات الدابەرگەن ۇلىنىڭ ارقاسىندا ەۋروپا چەمپيوناتىن وتكىزدىك. وسى كۇزدە ازيا چەمپيوناتىن وتكىزۋ جوسپارىمىز بار»، - دەدى ارمان شورايەۆ.

ەسكە سالا كەتسەك، بيىلعى «قازاقستان بارىسى» تۋرنيرى 1- شىلدە كۇنى ەلورداداعى «بارىس ارەنا» مۇز سارايىندا وتەدى. وسىمەن سەگىزىنشى رەت وتەتىن بەدەلدى باسەكەگە ەلىمىزدىڭ 14 وبلىسى، الماتى جانە استانا قالالارىنان جانە اسكەريلەر اراسىندا ىرىكتەۋدەن وتكەن 37 (ەكى بالۋان جاقىندا شىمكەنت قالاسىنان قوسىلىپ وتىر) ۇزدىك بالۋان قاتىسادى. ونىڭ ىشىندە بىلتىرعى تۋرنيردىڭ جەڭىمپازى قاتىسۋشىلار ساپىنا ىرىكتەۋسىز قوسىلادى.