شىمكەنتتە كومپيۋتەر ويىنى ءبىر وتباسىنىڭ ءۇش بىردەي مۇشەسىنىڭ ولىمىنە سەبەپشى بولدى

شىمكەنت. قازاقپارات - شىمكەنتتە ءبىر وتباسىن قىرىپ سالعان كۇدىكتىگە قاتىستى سوت ۇكىمى شىقتى.

وبلىستىق قىلمىستىق ىستەر جونىندەگى مامانداندىرىلعان اۋدانارالىق سوتى اناسى مەن ەكى ۇلىن ولتىرگەن ولەگ ۆلاسكيندى ءومىر بويىنا سوتتادى، دەپ حابارلايدى قازاقپارات ءتىلشىسى.

سوت تەرگەۋى بارىسىندا ايىپتالۋشىنىڭ وتباسى مۇشەلەرىن قالاي ولتىرگەنى بەلگىلى بولدى. انىقتالعانداي، جاس جىگىتتىڭ مۇنداي اۋىر قىلمىس جاساۋىنا كومپيۋتەر ويىنى سەبەپ بولعان. 27 جاستاعى ولەگ ۆلاسكين مەن ونىڭ تانىسى 21 جاسار الەكساندر كومپيۋتەر ويناپ، سوڭعىسى سوتتالۋشىعا 250 مىڭ تەڭگە قارىز بولىپ قالادى. الايدا ۇتىلعان جىگىت تانىسىنا بەرەشەگىن قايتارمايتىنىن جەتكىزگەن. وسىعان اشۋلانىپ، اقشانى قالاي دا قايتارماق بولعان ول اقپاننىڭ 8 ءى كۇنى تانىسىنىڭ ۇيىنە بارعان.

«ەسىكتى ونىڭ 12 جاستاعى ءىنىسى اشادى. ۇيگە كىرگەن سوڭ ويىندا ەشبىر كۇدىك جوق بالانى اتتىڭ اۋىر مۇسىنىمەن باسىنان بىرنەشە رەت ۇرعان. كەيىننەن باسىنا پوليەتيلەن پاكەتىن كيگىزىپ، تۇنشىقتىرعان. ولگەنىن بىلگەن سوڭ، ونىڭ دەنەسىن كەرەۋەتتىڭ استىنا جاسىرىپ قويادى. اراعا ءبىراز ۋاقىت سالىپ بارىپ، ۇيگە 50 جاستاعى اناسى ورالادى. قىلمىسكەر ونى دا قولىنداعى مۇسىنمەن ۇرىپ، جايراتقان. سوڭىنان توسىپ وتىرىپ، تانىسىن دا سول مۇسىنمەن ولتىرگەن. ءسويتىپ، ۇيدەگى قىمبات كومپيۋتەر مەن ەكى قالتا تەلەفونىن، 50 مىڭ تەڭگەلەرىن الىپ كەتكەن. ءۇش ادامدى دا ولتىرۋگە قولدانعان ءمۇسىندى دە الىپ كەتكەن. مارقۇمدار ءدال وسى مۇسىنمەن ۇرىپ ولتىرىلگەنىن سوت-مەديتسينالىق ساراپتاما دا دالەلدەپ بەردى»، - دەدى ءىستى قاراعان سۋديا ءابساتتار شاحيدينوۆ.

ءبىر ۇيدەن ءۇش ادامنىڭ ولگەنىن الدىمەن سول ءۇيدىڭ قىزى بىلگەن. ول ءوزىنىڭ تۋعان كۇنىنە كەلمەي جاتقان تۋىستارىن ىزدەپ، كۇيەۋىمەن ۇيىنە كەلەدى. قاراسا ءۇيدىڭ ءىشى قانعا بويالعان. سودان پوليتسياعا حابار بەرگەن. اراعا ەكى كۇن سالىپ بارىپ، ول تاراز قالاسىنان ۇستالعان. الايدا تەرگەۋدىڭ باستاپقى كەزىندە ۆلاسكين پروكۋرورمەن كەلىسپەي، قىلمىسىن مويىنداعىسى كەلمەگەن. ءبىراق كەيىننەن ءبارىن كورسەتىپ، باستان-اياق بايانداپ بەرگەن.

سوت-مەديتسينالىق ساراپتاما قورىتىندىسى ايىپتالۋشىنىڭ اقىل- ەسىندە پسيحيكالىق اۋىتقۋ جوقتىعىن، قىلمىستى قاساقانا جاساعانىن راستاعان. ءبىراق كومپيۋتەرلىك ويىندارعا قاتتى اۋەستەنگەن. سوت بارىسىندا ودان اناسى دا باس تارتىپ، بىردە-ءبىر وتىرىسقا كەلمەگەن. سۋديا جاس جىگىتتى قوعامدا قالدىرۋ قاۋىپتى دەپ تاۋىپ، ءومىر بويىنا باس بوستاندىعىنان ايىردى. جازاسىن بارىنشا قاتاڭ تۇرمەدە وتەيتىن بولدى. مۇنداي ۇكىممەن مارقۇمداردىڭ تۋىستارى دا كەلىسىپ وتىر.